Erosketa Karruselen dinamika jarri dute abian Apill eta Apymca elkarteek, beste urte batez. Laudio eta Amurrion tokiko merkataritza sustatzea da ekimenaren xedea. 12.000 euro zozketatuko dituzte horretarako herritarren artean, 2.000 euroko sei erosketa bonotan banatuta. Bonoen irabazleek goiz bakarra izango dute diru guztia gastatzeko, 126 saltokiren artean aukeratuta (72 Laudion eta 54 Amurrion). Saltoki horietan erosketak egiten dituzten bizilagunek txartel bana jasoko dute zozketan parte hartzeko.
Laudion lehen zozketa irailaren 18an egin zen. Raquel Beltran Buiza bizilagunari egokitu zitzaion bonoa. Hurrengo bi zozketak urriaren 2an eta 16an egingo dira, hurrenez hurren.
Amurrion, aldiz, bihar -irailak 28- egingo da lehen zozketa, eta urriaren 13an eta 26an hurrengoak.
Antolatzaileek nabarmendu dute orain inoiz baino beharrezkoagoa dela tokiko merkataritza babestea, “COVID-19ak sortutako zailtasunak guztion artean gainditzeko”.
Hemen topatu daiteke Laudioko dinamikaren inguruko informazio gehiago, eta hemen Amurriokoari buruzkoa.