Asteek aurrera egin ahala, ez dirudi Tubacex taldeko zuzendaritzaren eta langileen arteko akordiorik mahai gainean dagoenik. Horregatik, Langile Batzordeak greba deitu du gaurko, bigarren aldiz enpresak 150 behargin kaleratzeko asmoa plazaratu zuenetik.
Gaurko deialdiaren unerik garrantzitsuena 12:00etan izango da. Sindikatuek elkarretaratzea deitu dute Laudioko lantegiaren aurrean, bertan baititu bulegoak Tubacexek. "Erakutsi nahi diogu zuzendaritzari langileak gurekin daudela", azaldu dute sindikatuek.
Gaurkoa ez da lehenengo mobilizazio eguna. Izan ere, irailaren 17an lanuztea eta protesta jendetsua antolatu zuten; Amurriotik Laudiora jo zuten beharginek eta gero manifestazioa egin zuten.
Uztailean iragarri zuen Tubacex taldeko zuzendaritzak kaleratzeak egongo zirela enpresan eta handik gutxira aipatu zuen Aiaraldean 150 behargin botako zituela. Geroztik, hainbat aldiz batu dira langile batzordearekin, baina ez da adostasunik lortu bi aldeen artean.
Berez, langile erakundeek leporatu diete enpresako arduradunei COVID-19aren krisialdia baliatzea beharginei hainbat eskubide kentzeko eta prekarietatea handitzeko.