Egoera errepikakorra bilakatu da Aiaraldeko Renfeko zerbitzuaren erabiltzaileentzat geltokira joatea eta trenik ez egotea. Askotan eskuz egindako kartelek adierazten dute zerbitzu hori eten dela. Beste batzuetan, Twitter bidez aurreratzen dute eta maiz ez dago horri buruzko informaziorik:
#BilboAldiriak Gaur 2, hurrengo trenak kendu dira: 26562 13:17 Bilbao-Orduña / 26575 14:11 Bilbao-Orduña / 26584 15:05 Bilbao-Llodio / 26589 15:39 Llodio-Bilbao / 26698 17:05 Bilbao-Orduña / 26607 18:01 Orduña-Bilbao
— InfoRenfe (@Inforenfe) October 2, 2020
Aiaraldea Hedabidea Bilboko Aldirikoen ordezkaritzarekin jarri da harremanetan jakiteko zergatik gertatzen den hori eta Renfeko arduradunek hainbat arrazoi argudiatu dituzte gabezia horiek justifikatzeko.
Tren gidaririk ez
Arrazoi nagusia, antza, tren gidarien falta da. Renfek lan deialdi publikoa abiatu du, baina 48 gidari besterik ez dute kontratatuko estatu espainiar osoan. "Gainera, gehienak Kataluniara bideratuko dituzte", argitu dute.
Bilboko ordezkariek azpimarratu dute eurek presioa egiten dutela langileak eskuratzeko, baina hori Sustapen Ministerioaren esku dagoela: "Ministerioak erabaki behar du non inbertitu, eta COVID-19aren garaian badirudi murrizketak gertatzen ari direla. Egoera berean daude Andaluzian, Kantabrian edo Santanderren".
COVID-19aren eragina
Gidari eskasia horri gehitu behar zaio koronabirusak bajak areagotu dituela. "Nahiz eta oraindik positiborik ez duten eman, gidari askok izan dute harremana COVID-19ak kutsatutako ezagunekin. Horrek esan nahi du zenbait eguneko baja, batzuetan hamabikoa, hartu behar izan dutela PCR proba egin arte".
Gainera, langileek oporrak ere hartu dituzte eta ez dute hutsune guztiak betetzeko aukerarik izan. Azkenik, Renfeko arduradunek aipatu dute mantenua egokia izan arren, matxurak ere gertatzen direla: "Aldagai horien guztien batura dago trenak kentzearen atzean".