Herri Eskolak egin ditu Ikama ikasle antolakundeak gaur goizean Amurrion. San Anton plazan bildu dira ikasleak. Hispanitatearen Egunari buruzko solasaldia egin dute lehenbizi eta pankartak egiten jarri dira gero, herria aldarriz betetzeko.
Gaurko “inposatutako jai-eguna” dela nabarmendu dute ikasle antolakundeko kideek. “Ez da kointzidentzia, gure herriak jasaten duen zapalkuntzaren beste adibide argi bat da”, salatu dute, “genozidio indigena oinarri, espainolismoa goraipatzeko baliatzen da egun hau, eta Euskal Herriko ikastetxeetan beste edozein jai egun bat balitz bezala ospatzen dugu”.
Horren aurrean, “espainolak ez direla” nabarmendu dute ikasleek, eta uko egin diote opor eguna hartzeari.
Ernairen ekintza Arespalditzan
Ernai Gazte Antolakundeak, bere aldetik, Hispanitatearen Egunaren aurkako ekintza egin du Arespalditzan, Aiarako Udaletxeko balkoian. Espainiako Erregearen irudia eskegi dute eta sua eman diote.
Sare sozialen bidez zabaldu dute ekintza eta irakurketa.
Argazkiak: Ikama ikasle antolakundea