Atzo Orozkoko udalbatza aretoak hartu zuen Beldur Barik lehiaketaren 11. edizioaren aurkezpena. Eskualdeko izaera duenez, Aiaraldeko hainbat alkatek eta zinegotzik babestu zuten ekimena.
Pedromari Intxaurraga Orozkoko alkateak eta Idoia Camacho zinegotziak azaldu zituzten egitasmoaren aurtengo nondik norakoak. Beti bezala, emakumeen ahalduntzea islatzea da xedea, indarkeria matxistaren zein berdintasuna urratzen duten egoeren aurrean. Genero aniztasuna eta gizonezko autokrikitikoen jarrerak ere aintzat hartuko dira.
Horretarako bideoa sortu beharko da eta youtube edo vimeo plataformetan argitaratu, norberak gogoko duen eredua baliatuta: bideoklipak, olerkiak, film laburrak, flashmob, lipdub... Edonola ere, guztiek izan beharko dituzte azpitituluak, jende orok ulertu dezan edukia.
3 kategoria
Adinen arabera banatuko dituzte kategoriak:
- Kategoria: 2007an eta 2008an jaiotakoena.
- Kategoria: 2002. eta 2006. urteen artean jaiotakoena.
- Kategoria: 1994 eta 2001 urteen artean jaiotakoena.
Adinez nagusiak ez direnek tutore edo gurasoen baimenak aurkeztu beharko dituzte eta norbanako zein talde bakoitzak 3 proiektu sor ditzake, gehienez.
Lanak erregistratzeko azken eguna azaroaren 5a izango da eta horretarako www.beldurbarik.eus webgunera jo beharko dute parte-hartzaileek.
Sariak
Guztira, 2.400 euroko sariak banatuko ditu Aiaraldeko lehiaketak:
- 1. kategoriako irabazlea: 400€
- 1. kategoriako aipamen berezia: 200€
- 2. kategoriako irabazlea: 400€
- 2. kategoriako aipamen berezia: 200€
- 3. kategoriako irabazlea: 400€
- 3. kategoriako aipamen berezia: 200€
- Ikus-entzunezko lan onena: 300€
- Partaidetza saria: 300€