Borroka eguna deitu du Tubacexeko Enpresa Batzordeak datorren astearterako, urriak 27. 24 orduko lanuztea egingo dute, goizeko errelebotik gaueko txandara arte luzatuko dena.
13:30ean, aldiz, elkarretaratzea deitu dute Urduñan, zezen-plazaren alboan. Lantegiko arroparekin jantzita joateko deia luzatu diete sindikatuek langileei.
Izan ere, ordu horretan igaroko da Espainiako Vuelta hiritik. Hedabideek fokua kirol proban jarriko dutela baliatu nahi dute beharginek enpleguaren defentsaren aldeko aldarria zabaltzeko.
Bileran, adostasunik ez
Gaur berriro bildu dira sindikatuak eta zuzendaritza, Aldi Baterako Lan Espediente berriaz hitz egiten jarraitzeko, baina ez dute adostasunik erdietsi.
ELAk oharra plazaratu du bileraren nondik norakoak azaltzeko. Sindikatuak hainbat dokumentazio eskatu dio enpresari, ezarri nahi dituzten neurriak justifikatuak dauden edo ez jakiteko.
Alabaina, salatu dutenez, enpresak uko egin dio informazio hori emateari, beharrezkoa ez dela argudiatuta.
Beste zenbait kontu ere eskatu ditu ELAk: espedienteak lanaldia %50ean murriztea gehien jota, eta ondoren urtebetez gutxienez enplegua mantentzea bermatzea.
