Tubacexeko Enpresa Batzordeak irakurketa plazaratu du multinazionaleko kontseilari delegatuak, Jesus Esmorisek, hedabideetan eginiko hainbat adierazpenei erantzuteko.
Soldaten kostuak
EAEn ekoiztea “Austrian, Norvegian edo Italian ekoiztea baino gehiago” balio duela adierazi du kontseilariak, Aiaraldeko lantegietako lan-kostuen batazbestekoa 74.000 eurokoa dela argudiatuta.
Datu hori nondik atera duen galdetu diote sindikatuek Esmorisi. “Ez da bidezkoa hori baino askoz gehiago kobratzen duen pertsona batek hori esatea, bere lana mespretxatu gabe. Ziurtatu dezakegu langileen batazbestekoa ez dela kopuru horretara hurbiltzen, zuzendaritza eta goi-karguak sartu ez baldin badituzte, behintzat”.
Absentismoa
Lantegietan absentismoa handia (%10koa) dela ere aipatu du kontseilariak hedabideetan. Langileen ordezkariek azaldu dute Esmorisek datu hori puztu duela, ordu sindikalak, erabilera libreko orduak eta ordaindutako baimenak sartu dituelako.
“Absentismoa askoz baxuagoa da eta are txikiagoa izango litzateke istripu gutxiago egongo balira. Gogoratu behar dugu Esmorisek enpresa zuzentzen duenetik 4 kide ez direla lanetik etxera itzuli, baina badirudi denak balio duela gerra zikin honetan”.
“Absentismoa askoz baxuagoa da eta are txikiagoa izango litzateke istripu gutxiago egongo balira”
Fakturazio jaitsiera
Fakturazioa ere izan du hizpide Esmorisek, %50 jaitsi dela aipatuta. “Orduan, zergatik planteatzen da %80ko erregulaziora iristen den Aldi Baterako Enplegua Erregulatzeko Espediente berri bat? Argi dugu, haserrealdi hutsa da”, erantzun du Enpresa Batzordeak, eta nabarmendu du ez dela egia eskualdeko lantegietan multinazionalaren produktuen %30a baino ez dela ekoizten. “Ez da berdina guk komertzializatzen duguna eta gure lantegietatik igarotzen dena. Tubacexen arima gara, eta bere produktu gehienen iturburua”.
Enplegua Erregulatzeko Espedientearen mehatxua
Esmorisek eginiko mehatxuei ere erantzun diete sindikatuek. “Mehatxua etengabekoa da eta berriro errepikatzen da. Berriz aipatu nahi dugu gertatuko denaren errua ez dela komitearena izango, Eurak -zuzendaritza- dira guztiz honen erantzule bakarrak”.
“Ez da egia eskualdeko lantegietan multinazionalaren produktuen %30a baino ez dela ekoizten”
Horrez gain, multinazionalaren gainontzeko lantegietan 400 pertsona kaleratu dituztela aipatu du Esmorisek, eta hori ere gogor kritikatu dute sindikatuek. “Batzuk loa galtzen dugu pertsona horietako askok aurrean duten egoera dramatikoagatik, eurek ez dute sentikortasun apur bat ere ez erakusten”.
Horren guztiaren aurrean, orain arteko jarrera bera berretsi dute Enpresa Batzordeko kideek: “Prest gaude negoziatzeko, baina errespetuz eta ez inposizioz”.
Horrez gain, zuzendaritzak hainbat dokumentazio ukatu diela salatu dute. Horren aurrean, batuta egoteko eta murrizketa planteamenduen aurrean erresistitzeko deia luzatu dute langileek.