Aiarako Kuadrillako jeltzaleek sare sozialetan egin dute publiko salaketa. Izan ere, EAJk adierazi du zenbait eraso gertatu direla azken egunotan Amurrion zein Laudion, hiri-higiezinetan, udal azpiegituretan zein saltoki baten kontra.
Zehazki, Amurrioko Abascal dendaren kontra margoketa eta harrikada jazo da. Horrelako ekintzen aurrean, EAJk jakinarazi du elkartasuna adierazi nahi diela mehatxatu dituzten pertsonei. Halaber, alderdiak berretsi du, bere ustez, "elkarrizketa dela tresna eraginkorrena, eta desberdinarekiko errespetua, bizikidetza eta bakea eta askatasuna balio gorenak".
Bere aldetik, Amurrioko EH Bilduk sare sozialetan salatu du horrelako erasoak ez direla onargarriak. Zehazki, koalizioak honakoa adierazi du: "EH Bildu Amurriok onartezina deritzo bart gauean udalerriko familia batek bere dendan jasotako erasoari".
Orain Amurriok ere zabaldu du oharra: "Horrelako ekintzek, jabeak kaltetzeaz gain, ez dute laguntzen ultraeskuindarrak menperatzen, nahiz eta gehiengo sozialaren kontrakoak izan. Eta, bestetik, guretzat lehentasun diren kontuak desbideratzea eragiten dute; krisi ekonomiko eta sozialari irtenbideak bideratzea, alegia".