Dozenaka herritar bildu ziren atzo -azaroak 14- Laudio eta Amurrion eginiko elkarretaratzeetan. Eskualdeko hainbat gimnasio eta kirol zentroren artean egin zuten deialdia, euren jardunaren garrantzia aldarrikatu eta, arazoa baino, “soluzioaren parte” direla nabarmentzeko.
“Neurri asko hartzen ari dira eta ez gaude guztiz ados”, azaldu zuen Ibai Ruiz Abasolok, antolatzaileetako batek, Amurrioko elkarretaratzean. “Gure zentroak birusaren aurrean erabat prestatuak daudela erakustea da ekimen honen xedea”.
Neurri asko hartu dituztela nabarmendu zuen kirolariak, “distantziak mantentzea, garbiketa bermatzea eta beste asko”. Gauzak hala, kirol azpiegiturak “erabat seguruak” direla ziurtatu zuen Abasolok. “Gainera, jendeak kirola egin behar du. Oso garrantzitsua da osasunerako. Gu laguntza bat gara, ez gara arazo bat, ezta gutxiago ere”.
Joseba Etxebarria Arzak, bere aldetik, beste aldarri bat jarri zuen mahai gainean: mugikortasuna malgutzea. “Gure ondoan dauden udalerrietako biztanleek aukera izan beharko lukete hemengo zentroetara bertaratzeko, euren bizitokietan horretarako aukerarik ez baldin badute”.
Aurrera begira
“Zailena” dagoeneko egin dutela azpimarratu zuten mobilizazioen sustatzaileek. “Eskualdeko bederatzi klub batzea lortu dugu, egoera normal batean konpetentzia izango ginatekeen arren”.
Mobilizazio denetan, borrokan jarraitzeko asmoa iragarri zuten. “Ez dugu amaitu, hasiera izan da. Elkarrekin egongo gara, hitz egingo dugu, eta ideia aterako ditugu, helburu batekin: kirola funtsezko jarduera izatea, eta edonork izatea gure zentroetara etortzeko aukera. Kirola osasuna delako”.