Uxoa eta Arkada en la Grada Laudioko eta Amurrioko futbol areto klubak egoera korapilatsuan daude une hauetan. Euren kinkaren iturburua da Eusko Jaurlaritzak aukera eman diola kirol semiprofesionalari lehiaketak jarraitzeko eta euren kategoria, Euskal Liga, horien artean dagoela.
Gauzak horrela, larrialdiko erabakia behartu zuten hainbat klubek denboraldiko azaroko jardunaldiak atzeratzeko, baina ez dakite aurrerantzean zer gertatuko den. Hurrengo astean bilera egingo dute Eusko Jaurlaritzak eta Euskal Federazioak.
Mikel Iglesias Uxoa klubeko jokalariak azaldu du egoerak ez duela zentzu handirik Laudio eta Amurrioko kasuetan: "Laudioko kiroldegia itxita dago, hortaz, ezin dugu entrenatu. Gainera, etxeko partidak, jokatzekotan, Gasteizen egin beharko genituzke, hemen ezinezkoa baita".
Eragin ekonomikoa
Iglesiasek erantsi du Euskal Federazioak ere ez duela lagundu pandemiaren kudeaketan: "Tematu dira denboraldia hastearekin, ez zegoenean argi zer gertatuko zen kirolarekin. Fitxak ordaindu ditugu eta ez dakigu partidarik jokatzeko aukerarik izango dugun".
Eusko Jaurlaritzak ez ditu lehiaketak eten talde semiprofesionaletan. Hortaz, Uxoa eta Arkada en la Grada partiduak jokatzera beharko nahi ditu Euskal Federazioak. Klubek lehenesten dute mugikortasuna murriztea egoera aldatu arte eta, momentuz, txapelketa atzeratzea lortu dute
Arlo ekonomikoan egungo egoera kaltegarria izan daiteke klubarentzat eta jokalarientzat, Uxoako kideak aipatu duenez: "Semiprofesionaltzat jotzen gaituzte, baina guk ez dugu kobratzen jokatzeagatik, guztiz kontrakoa, ordaintzen dugu. Talde gehienak arabarrak eta gipuzkoarrak direnez, bi astean behin atera behar gara kanpora eta horrek gastua dakar. Gainera, Gasteizen lehiatu beharko bagenitu etxeko partidak, diru gehiago gastatuko genuke. Horri gehitu behar zaio dutxak ezin direla erabili eta bidaia osoa egin behar dugula elkarrekin, dutxatu gabe".
Iglesiasek adierazi du euren patrikatik aterako dela finantzazio gehiena: "Herriko ostalariak eta establezimenduak dira gure babesle ekonomikoak, baina egungo errealitatea ikusita, ez dut uste laguntza askorik eskuratu dezakegunik".
Osasuna zalantzan
Une hauetan, klubak baimenak eskatzen ari dira, liga berriro hasiko balitz, parada izateko bestelako herrietara joateko. Hala ere, Mikel Iglesiasek uste du osasuna ere arriskuan jar dezaketela: "Klubek idazkia egin eta liga gelditu baino lehen, guri zegokigun Lezon jokatzea. Une horietan udalerri hori zen puntu gorria pandemian. Jokalari semiprofesionalak gara, ezin dugu astero PCR proba bat ordaindu jakiteko birusa dugun eta norbait kutsatu dezakegun. Nik behintzat, ez diot zentzu handirik ikusten tabernak itxita dauden bitartean, gu hortik jokatzen ibiltzeari. Suposatzen da mugikortasuna mugatu behar dela, eta hori ez da bateragarria asteburu guztietan Gasteiz edo Gipuzkoara joatearekin".