Ogasunari milioi bat euro baino gehiago zor dieten enpresa eta pertsona fisikoen urteroko zerrenda argitaratu dute Arabako eta Bizkaiko Foru Aldundiek. Aiaraldeko hiru izen agertzen dira zerrenda horietan.
Ruben Bravo Gonzalezena da horietako bat. Enpresari hori aurreko urteetan ere agertu da Arabako Foru Aldundiaren zerrendan, eta ogasunari zor dion dirua pilatzen ari zaio. 1.709.452,97 euro zor zituen eta aurten 1.752.993,67 euro zor ditu.
Lau enpresa ditu Bravo Gonzalezek guztira: Iridytrio S.L, Platinorumba S.L, Activos por impuestos diferidos S.L eta Agricola Nini S.L. Lehen hiru enpresak Laudioko Jose Mardones kaleko etxebizitza batean dute egoitza soziala. Laugarrena, aldiz, Kantabrian kokatuta dago.
Somolsa
Somolsa enpresa urduñarra ere berriz agertu da Bizkaiko Foru Aldundiaren zerrendan. 2.370.095,80 euro zor zituen iaz eta aurten, aldiz, 2.397.825,9 euro. 2004. urtean itxi zen fabrika hori eta ordainketak etenda ditu orduz geroztik.
Urtero agertzen da zordunen zerrendan eta geroz eta handiagoa da zor duen dirua, errekarguak handitzen direlako.
Murgako enpresa
Recuperación de Materiales Industriales S.A. enpresa estreinako aldiz agertu da aurten zerrendan. 1.090.509,96 euro zor dizkio ogasunari. Murgan kokatua dago enpresa hori eta 36 langile inguru zituen. Hartzekodunen lehiaketan dago orain, itxiera prozesuan.