Mugarriak: Aiaraldea 2010-2020 argitalpena sortu du Aiaraldea Hedabideak, azken 10 urteetan eskualdeak bizitako bilakaeraren adierazle. Orotariko gaiak argazki eta idatzizko erreportajeetan bildu dituzte hedabideko kazetariek, eta 200 orri izango ditu guztira argitalpenak. Hala, euskararen alorrean, jendartean, sozioekonomian, kulturan, kirolean, hezkuntzan zein politikan emandako aldaketak izango ditu ardatz liburuak. Gainera, iritzi artikulu, ilustrazio eta komikiak ere edukiko ditu.
Landutako ardatzen artean daude, besteak beste, hamarkadak utzitako kultur zein kirol ekimen bereziak, erronka bitxiak, jaialdi erraldoiak, azpiegitura berriak, lan gatazkak, hezkuntzako sistema aldaketak, feminismoaren hedapena, pantailaren eragina hezkuntzan, aisialdi talde berrien sorrera eta abar. Horrez gain, gizartean errotutako fenomeno berriak ere jorratzen dira; runner edo korrikalarien moda, erosteko moduen aldaketa edota elikadura kasu.
Proiektu berezia izanik, botaldia ere mugatua izango da, 2.500 alekoa, hain zuzen. Bazkide eta zenbait instituzioen babesari esker, ordea, doakoa izango da tokiko "historia oroigarria".
Banaketa puntuak
Udalerri guztietan egongo da argitalpena eskuratzeko aukera, aleak agortu arte. Aiaraldea Ekintzen Faktoriako bazkideek etxean jasoko dute liburua. Gainontzekoek, erredakzioa@aiaraldea.eus postara bidali beharko dute mezua, eta interesdunari bere herriko banaketa puntua eta eguna gogoraziko zaio. Izan ere, zenbait herritan Gabonetako ekitaldietan banatuko da alea.
Solasaldiak
Bestalde, zenbait solasaldi antolatuko ditu Aiaraldea Hedabideak Gabonetarako. Okondon, esaterako, herriko emakume kirolariak elkartuko dituzte mahai bueltan (abenduaren 28an, 18:00etan); eta Aiaran Aritz Arberas, Izaskun Bengoa eta Mikel Landa txirrindulariak (abenduaren 29an, 18:00etan). Hitzaldi guztiak streaming bidez emitituko dira Aiaraldea.eus webgunean. Aurrerantzean ere, jarduera publikoak sustatuko ditu hedabideak.
Egitasmo berezi hau Aiaraldea Hedabidearen 10. urteurrenaren baitan kokatzen da. Iaz, Aiaraldeko Kirol Urtekaria ekoitzi zuen hedabideak, baina aurten ikuspegia eta eskaintza zabaldu du komunikazio faktoriak, herritarrentzat zein euskararentzat ekimen interesgarria izan daitekeelakoan.