Gabon garaian kantuak entzuteko aukera ugari egongo dira eskualdean, baita bertsoak ere. Izan ere, datozen egunetan hiru emanaldi egongo dira, Laudion, Urduñan eta Amurrion hain zuzen.
Laudion, Miren Amuriza eta Onintza Enbeita ariko dira kantuan Basalarrina elkartearen eskutik, abenduaren 24an. 12:00etan izango da hitzordua elizako arkupeetan, "gabonetako azoka" aitzakiatzat hartuta. "Goxo-gabon" ekitaldi sortaren barruan dago eskaintza.
Urduñan, berriz, Oihana Bartra, Sebastian Lizasko , Uxue Alberdi eta Manu Bendala oholtzaratuko dira larunbatean. Frontoia bihurtuko dute eszenatoki, eta 18:00etan hasiko da ekitaldia. Izen-ematea Alondegian egin behar da, abenduaren 25 aurretik.
Bestalde, urteko lehen larunbateko hitzordua mantendu du Amurrioko Udalak, Antzokian antolatzen duten "Bectekada" medio. 19:00etan ekingo diote jardunari Euskal Herriko Txapelketa Nagusiko finalistek. Aurtengoan, Naroa Sasietaren gidaritzapean Aitor Sarriegi, Maialen Lujanbio, Aitor Mendiluze, Amets Arzallus, Sustrai Colina, Unai Agirre, Beñat Gaztelumendi eta Jon Maia bertaratuko dira. Amurriokoa izango da sarrera doakoa ez duen bakarra, 8€ balioko baititu ikuskizunak.