Agerraldia eskaini du gaur EHBilduk Laudioko Lamuza Parkeko Kasinoan. Europako Funtsekin finantzatzeko zortzi proiektu aurkeztu dituzte Aiaraldeko EH Bilduko hautetsiek. 31 milioi euroko hasierako inbertsioa suposatuko lukete gaur aurkeztutako proposamenek.
Eskualdeko Ospitalea, Aldiriko tren zerbitzuen hobekuntza, Nerbioiko parke lineala, ekintzailetza kooperatiborako laborategia, sukalde zentraleko sistema, araztutako uren balorazioa, zuntz optikoa eta adinekoen zaintzarako zerbitzuak dira aurkeztutako proiektu estrategikoak. "Aiaraldeak ezin du aukera hau pasatzen utzi eta gure proposamena errealista da eskualdeko proiektu handiei erantzun ahal izateko", azaldu du Joseba Vivanco Arztiniegako alkateak, Europako Funtsei erreferentzia eginez; eta hauen inguruan eztabaidatzeko foro baten beharra aldarrikatu du.
Europako Funtsen 31 milioiko hasierako inbertsioarekin finantzatzeko ZORTZI PROIEKTU ESTRATEGIKO proposatu ditugu Aiaralderako.
— EH Bildu Araba (@ehbilduaraba) January 5, 2021
⏫Proiektuen artean, eskualdeko ospitalea edo aldiriko trenaren zerbitzua hobetzea nabarmendu ditugu.https://t.co/xIbBvDKP4W
Eskualdeko Ospitalea
Aiaraldeak, 40.000 biztanle baino gehiagorekin, “osasun arloan arazo nabarmenak” dituela adierazi du EH Bilduk. Horregatik, “biztanleriaren gehiengoaren aldarrikapenekin bat eginez” Eskualdeko Ospitale baten erakintza bultzatzeko konpromisoa hartu du.
Koalizioak 10 milioi euroko inbertsioa kalkulatu du proiektua aurrera atera ahal izateko. Abiapuntua herritarren parte-hartzea izango duen osasun baliabideen azterketa sakon batean jarri dute.
Tren zerbitzua indartzea
Tren bide sarearen hobekuntza da mahaigainean jarritako beste proiektu garrantzitsuetako bat. Aldiriko tren-zerbitzuaren gabeziak salatu ditu azken hilabeteetan EH Bilduk: “Aiaraldea Bilbotik 30 kilometrora dago, eta horrek hobekuntza kualitatiboa eskatzen du Bilbo eta Urduña lotzen dituen C3 linean”, horretarako 5 milioi euroko inbertsioa proposatu dute.
Elikadura-sistema eraldatzeko pausoak
Sukalde sistema zentrala da EHBilduk azpimarratu nahi izan duen beste proiektuetako bat. “Eskualdean aurrekaririk ez duen proiektu berri hori balio-kateko eragileen arteko lankidetzatik abiatuko litzateke. Sukalde horrek elikadura-zerbitzua emango lieke zaharrei, pertsona lagunduei, hirugarren adinekoen egoitzei, ikastetxeei, behar bereziak dituzten pertsonei, jantoki sozialei, enpresei, partikularrei...” azaldu dute Lamia Arcas eta Iñaki Ibarluzea zinegotziek.
Hori gauzatzeko lau milioi euroko inbertsioa planteatu dute EH Bilduko kideek.
Nerbioiko Parke Lineala
Aurkeztutako proiektu estrategikoen artean Nerbioiko Parke Lineala berreskuratzea da beste lan-lerroetako bat. Gaur gaurkoz Amurrio-Delika zatia falta da. EH Bilduren iritziz, ibilbidearen azken zati hori behin amaituta, oinezko eta bizikletentzako ibilbide-sare bat sortzeko aukera zabalduko luke.
Sektore desberdinei bultzada emateko Ekintzailetza Kooperatiborako Laborategi bat sortzea, Amurrion adinekoen zaintza erdigunean jarriko duen zentro bat sortzea, eskualdeko herri eta biztanle guztientzat zuntz optikoa eskuragarri jartzea eta Aiaraldeko araztegi berrietan prozesatutako ura prozesu industrialetarako berrerabiltzeko proiektua garatzea dira gainerako proiektu estrategikoak. Azken hauen hasierako inbertsioa 2 milioi eta 1,5 milioi eurokoa litzateke.