EH Bildu Aiaraldeak 37 alegazio aurkeztu dizkio Gorobel mendilerroaren aprobetxamendua eta gozamena arautzen duen ordenantzari. Mendilerroaren pribatizazioa eta gehiegizko ustiapena saihestea, baserritarrak babestea eta etxolen kudeaketa dute helburu alegazio horiek.
"Abeltzaintza estentsiboa eta, beraz, abeltzaintza-ustiategien bideragarritasuna defendatu nahi dugu eta, aldi berean, natura-ingurune bizi bat mantentzearen alde egiten dugu. Hori da gure programan defendatzen duguna eta etorkizuneko belaunaldiei utzi nahi dieguna. Horregatik egiten dugu lan Aiaraldea bizi baten alde, abeltzaintzarekin eta ingurumen ondarearekin" azaldu du Koldo Mendioroz Aiarako EH Bilduko hautetsiak.
Mendiei buruzko Foru Plana betetzea eskatu du koalizio abertzaleak, Besteak beste, honakoa aldarrikatu dute: egutegia errespetatzea, bazkatu daitekeen abelburuen gehieneko kopurua eta aziendaren mugimendua zaintzea eta abelburu mota bakoitzerako kuotan soberakinak banatzea.
EH Bilduren iritziz, arauan ezarritako aprobetxamendua betetzea ezinbestekoa da abeltzaintza estentsiboa babestu eta zero kilometroko lehen mailako produktuak ekoizten dituzten baserritarrak babesteko.
Etxolen inbentario bat egitea ere eskatu du koalizioak, artzaintzarako erabiltzen direla bermatzeko
Mendilerroko txabolak
Mendilerroan zehar banatuta dauden etxolak ondo erabiltzen direla zaintzea ere eskatu du koalizioak. Txabola horietako asko, bere garaian abeltzaintzara bideratuta egon arren, jarduera hori garatzen ez duten pertsonen esku daude gaur egun. Horregatik, bost urtean behin txabolen errolda eguneratzea proposatu du EH Bilduk.
Proposamena da etxola horiek abeltzaintza jarduera makilarekin burutzen duten pertsonei gordetzea eta, jarduera uzterakoan, Salbada Mendilerroko Ermandade Zaharraren jabetzara igarotzea. "Jarduera belaunaldiz belaunaldi aldatzen denean bakarrik transmititu ahal izango da" nabarmendu du EH Bilduk.
Gainera, etxola horiek birgaitu eta berreraikitzeko plan bat mahaigaineratzeko beharra ere azpimarratu du talde politikoak. "Era berean, horiek erabili ahal izateko, artzaintza-lanak egiten dituen pertsonak gutxienez 120 ardi eduki behar ditu, gutxienez hamar urtez, eta beste bost urtez luzatu ahal izango dira. Artzaintzarekin zerikusirik ez duen beste edozein erabilerak Ermandadearen baimena izan beharko du", azaldu dute koalizioko kideek.