Gaur arratsaldean izan da Tubacexeko langileen ordezkarien eta zuzendaritzaren arteko bilera, azken honek ezarri nahi dituen kaleratze eta neurrien harira.
Bilera 16:00etan hasi da multinazionalak Laudion duen lantegiko bulegoan, eta 17:40ak aldera amaitu da. Ehundik gora langile bildu dira enpresaren aurrean denbora horretan zehar. Ondoren, Enpresa Batzordeko kideek adierazpenak egin dituzte bertaratutako hedabideen aurrean.
Enpresak 150 langile kaleratu nahi ditu guztira, Enplegua Erregulatzeko Espedientearen bidez. Aldi Baterako Enplegu Erregulazioko Espediente berriak, aldiz, martxoaren 29tik irailaren 10era ezarri nahi dute, eta %60ko gehienezko erregulazioarekin. Langile guztiei eragingo die neurri horrek.
Greba mugagabea mahai gainean
Albistea “oso txarra” dela nabarmendu du Edu Iberniak, “150 familiak langabezian amaitu dezaketelako”.
Gauzak hala, langileen erantzuna “sendoa” izango dela iragarri du Enpresa Batzordeko lehendakariak bileraren ostean eginiko agerraldian. 24 orduko greba egingo dute, ostegun eta ostiralean: “Lehen egunean mobilizazioa egingo dugu Laudion, 18:00etan lantegitik abiatuta. Bigarren egunean, aldiz, kotxe-karabana egingo dugu”, iragarri du Iberniak, eta gaineratu du astelehenetik aurrera greba mugagabea deitzeko asmoa jarri dutela mahai gainean.