Bizilabe ekimena jarri dute abian Bizkaiko Foru Aldundiak eta Nerbioi-Ibaizabaleko gazteria sailek, Elhuyar fundazioarekin elkarlanean, bigarren urtez jarraian. Guztira 10 zientzia-tailer eskainiko dituzte, baita Urduña eta Orozkoko gaztelekuetan ere.
Orozkon CSI tailerra egingo dute otsailaren 27an eta martxoaren 27an. Bertan, bakterioei eta genetikari lotutako esperimentuak eginez, misteriozko istorio bat argituko dute parte hartzaileek. Urduñan, berriz, denetariko zientzia eta teknologia esperimentuak uztartzen dituzten Steam Challenge tailerrak eskainiko dituzte martxoaren 26an eta apirilaren 30ean.
Tailerrak doan izango dira, eta parte hartzaile kopuru mugatua izango dute. Izena emateko herri bakoitzeko Gaztegunearekin jarri behar da harremanetan mezu elektroniko bidez: infoinduma@yahoo.es Orozkoren kasuan eta kulutra@urduna.com Urduñaren kasuan.
Online tailerrak
Ibaizabal-Nerbioiko 10 udalerrietan antolatuko diren tailerrez gain, bi online saio ere egingo dituzte Bizilabe ekimenaren barruan. Oraindik ez dituzte saio hauen datak zehaztu. Horretaz gain, eta COVID-19ari lotutako neurriek ahalbidetzen badute, Ibaizabal-Nerbioiko enpresa bat bisitatzeko txangoa egitea ere aurreikusi dute, baita gazteguneetan zientzia eta teknologia arloan lan egiten duten emakumeen lana bistaratzeko horma irudiak margotzea ere.