16 egun bete dituzte gaur Tubacexeko langileek greban. Goiz eta arratsalde mugituak izan dira langileentzat. Laudioko piketeko kideek eserialdia egin dute Ertzaintzaren aurrean. Fabrikara sartzen den autobusean sartzen uztea eskatu diete Enpresa Batzordeko kideek poliziari, baina ez diete utzi.
Autobusak fabrikara sartu ostean, Ertzaintzan Aiaraldea Hedabideko kazetari bat atxikitu eta identifikatu du. Hedabide bereko beste kide bat gertatzen ari zena grabatzen hasi da mugikorrarekin, eta agente batek kolpe batez bota dio sakelakoa, ezkutua baliatuta. Tentsio uneak bizi izan dira baina ez da ezer gehiago gertatu.
Amurrion, aldiz, poliziak espaloi bakarrera mugiarazi ditu grebalariak, autobusa pasatzera zioanean.
Arratsaldean, aldiz, dantza baliatu dute beharginek protesta teknika gisa. 'Paquito chocolatero' dantzatu dute Laudion poliziaren aurrean, eta 'La Macarena' Amurrion.
Ordezkari instituzionalen agerraldia astelehenean
Datorren astean emango diote langileek jarraipena mobilizazioei. Lehengo zita jarri dute dagoeneko: agerraldia egingo dute eskualdeko ordezkari instituzionalekin, 11:30ean Laudioko lantegiaren aurrean.