1.497.000 euro jaso zituzten guztira Tubacexeko Administrazio Kontseiluko kideek iaz, soldata eta dietetan. Hala jakinarazi du multinazionalak Merkatuen eta Lehiaren Espainiako Batzordeari (MLEB) helarazitako txostenean.
Diru eta kontseilari gutxiago
Dokumentu horrek aipatzen du zuzendaritzako kideek soldatak %30 jaitsi zituztela 2020ko biharren hiruhilekoan, COVID-19aren pandemiari aurre egiteko neurri ekonomikoen plan baten ondorioz. Gauzak hala, 2019an baino 87.000 euro gutxiago jaso dituzte. Aipatzekoa da, gainera, 2019an baino 3 kontseilari gutxiago daudela orain zuzendaritza organoan. Alvaro Videgain Murok -Tubacexeko presidenteak- eta Jesus Esmoris Esmoris kontseilari delegatuak jaso zuten diru kopururik handiena, 242.000 eta 472.000 euro, hurrenez hurren.
Dibidenduak
Iaz plazaratutako memorian, Tubacexeko zuzendaritzak aipatu zuen akziodunei dibidendoak banatzeari utziko ziola denbora tarte batez, COVID-19aren pandemiaren aurrean “zuhur” jokatzeko.
Hala ere, azpimarratzekoa da Administrazio Kontseiluak 6 milioi euro banatu zituela 2019an akziodunen artean (0,046 akzio bakoitzeko). “Tubacexek akziodunei dibidendu erregular bat ordaintzeko konpromisoari eutsiko dio”, aipatzen du txostenak, “COVID-19aren ondorioak hobeto ikusten direnean kontseiluak berriro ebaluatuko du egoera eta dibidendua berrezarriko du, egokitzat ikusten bada”.
OHARRA
Aiaraldeko hiru enpresa daude burtsan: Tubos Reunidos, Tubacex eta Vidrala. Merkatu horretan aritzen diren sozietateak derrigortuta daude euren Administrazio Kontseiluko kideen informazioa publiko egitera Merkatuen eta Lehiaren Espainiako Batzordearen (CNMC) bidez. Otsailaren amaieran argitaratu ziren Tubacex eta Vidralaren datuak. Tubos Reunidosek oraindik ez ditu bere datuak argitaratu. MLBNk Aiaraldea Hedabideari jakinarazi dionez, apirilaren 30an eman beharko du Amurrioko enpresak informazio hori beranduenez. Bestetik, Tubacexeko zuzendaritzako soldaten infografietan lizentzia librekoak diren argazkiak soilik jarri dira.