Greba mugagabearen 34. eguna izan dute gaurkoa Tubacexeko langileek. Azken astean bezala, polizia ugari bertaratu dira goizeko piketeetara, zuzendaritzako autobusen sarrera bideratzeko.
Aernnovako langileekin elkartasuna
Eguerdian Bilbora bertaratu dira Tubacexeko grebalariak Aernnova eta PCB enpresetako langileekin batera elkarretaratzea egiteko Bilboko epaitegiaren aurrean. Izan ere, Arabako Aernnova enpresan ezarritako Enplegu Erregulazio Espedientearen aurkako inpugnazioen lehenengo epaiketa eguna burutu da gaur.
Sindikatuen arabera, aeronautika enpresak COVID-19arekin lotutako kaleratzeak egiteko debekua urratu du. Epaiak aurrekari bat ezarri lezake, eta indarrean dagoen espedientea baliogabetu.
Mobilizazio gehiago
Mobilizazioekin jarraituko dute Tubacexeko langileek datozen asteetan. Ostegun honetan Deriora joango dira autobusez, bertan baitago multinazionalaren zuzendaritzaren egoitza. Datorren astelehenean -martxoak 22- eskualdeko enpresa batzordeek Laudioko lantegiko sarreran elkartzeko deia egin dute, 10:00etan. bertatik manifestazio bat abiatuko dute eskualdeko enpleguaren defentsan.