Tubacex enpresako grebalariek indartsu ekingo diote Pazko Asteari. Berez, gaur egin behar zuten Umeen Eguna, baina eguraldi iragarpena ez zenez egokia horretarako, ostegunean izango da.
Zehazki, 10:00etan bizikleta ibilaldia abiatuko dute Amurrioko Ciclos Ormaechea dendatik eta handik Laudiora joko dute, Tubacexeko lantegira, hain zuzen. Behin Laudion, ginkana egongo da haurrentzat eta 12:30ean txokolatea eta txistorra jateko aukera. Azkenik, Aritz Lili ipuin kontalariak emanaldia eskainiko du 12:45ean.
Umeen Egunean parte hartuko dutenei eskatu diete enpresako arropa eta grebalarien ikurrak soinean eramatea.
Familiako kide guztiek protestetan parte har dezaten deialdi gehiago antolatu dituzte grebalariek orain arte, otsailaren 15ean adibidez:
Euskal Itzulia eta manifestazioa
Bihar Euskal Itzuliak Laudio zeharkatuko duenean, grebalariek lekua hartuko dute lantegiaren inguruetan, euren aldarrikapenak errepidera eramateko.
Azkenik, aste honetako egitaraua Bilbon amaituko da, igandean, bertan manifestazio jendetsua egitea aurreikusi baitute beharginek. 11:30ean abiatuko da mobilizazioa Bilboko Jesusen Bihotza plazatik.