Grebaren eragina handia izaten ari dela aitortu du Tubacexeko zuzendaritzak

Tubacexeko langileak, Amurrioko piketean. / Aiaraldea.eus

Lantegietako buruek ohartarazi dute grebarekin jarraituz gero arriskuan egongo dela “Laudioko eta Amurrioko lantegietan jarraitzen duten beste 600 langileen etorkizuna”.

Grebaren eragina handia izaten ari dela aitortu du Tubacexeko zuzendaritzak, langileei bidalitako buletin batean. Dokumentu horretan azaltzen denez, grebak “kalte konponezinak” eragin ditu dagoeneko enpresaren bezeroekiko, hainbat eskaeretan eragina izan duelako. Gauzak hala, multinazionalaren egoera komertziala larria dela nabarmendu du zuzendaritzak. 

“600 langileen etorkizuna arriskuan”

Grebalarien aurka jo du zuzendaritzak, hainbat langilek “mehatxuak, presioak eta irainak” jasotzen ari direlako lanera joan ez daitezen, “eta ez dira onargarriak”. “Enpresan lan egiten duen pertsona bakoitzak erabili behar du greba edo lanaz erabakitzeko eskubidea, horrek inolako errepresaliarik sortu gabe. Pertsonen askatasuna pertsona guztiena da, ez batzuena bai eta besteena ez”. 

Zuzendaritzak nabarmendu du indibidualak direla “etorkizunera begira” bakoitzak hartzen dituen erabakiak. Gauzak hala, “erantzunkizun indibidualaren” aldeko deia luzatu du. 

“Erantzunkizun indibidualaren” aldeko deia luzatu du enpresak, eta grebaren jarraipenaz hausnartzea eskatu die langileei

Bukatzeko, grebaren egokitasunaz hausnartzeko gonbita luzatu die enpresak beharginei. Izan ere, Lantegietako buruek buletinean ohartarazi dute grebarekin jarraituz gero arriskuan jarriko dela “TTI eta Aceralava osatzen jarraitzen duten beste 600 langileen etorkizuna”. Horrez gain, ziurtatu du protestek ez dutela balioko kaleratutako langileak berriz onartuak izan daitezen. 

Kaleratzeak

Kaleratzeen egoerari buruzko informazioa ere eskaini du zuzendaritzak buletinean. 128 enplegu suntsituko dituzte guztira, 11 aurrejubilazioa, 22 baja boluntario eta 95 kaleratze traumatiko eginez. “Pertsona guztiei jakinarazi zaie kontratua amaitu zaiela eta kalte-ordainak jaso dituzte dagoeneko”. Gauzak hala, Enplegua Erregulatzeko Espedientearen prozesua bukatutzat eman du enpresak.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide