Euriak ez ditu Bilboko kaleak bete dituzten milaka lagunak gelditu. Grebaren 60. egunean Tubacexeko langileak "lehenengo egunean bezain indartsu" daudela erakutsi dute. "Kaleratze, irtetze-data eta ABEEn ezarpenarekin gu banatzea lortu nahi dute, baina gure duintasuna, adiskidetasuna eta batasuna egunez egun hazten doaz, ez dute lortuko", adierazi dute mobilizazioaren ostean eginiko ekitaldian.
Aiaraldearen defentsan
Enpresa Batzordeko kideek eskerrak eman dizkiete egun guzti hauetan beharginekin batera mobilizatutako herritar eta elkarte guztiei. Halaber, gogorarazi dute gaur gaurkoz Tubacexek bizi duen egoera beste edozein enpresak ere bizi dezakela aurki: "Tubacexek erabili duenaren moduko estrategiek arriskuan jartzen dituzte enpresaren etorkizuna eta eskualde osoarena".
Instituzioei mezua
Eusko Jaurlaritzari eta alderdi politikoei ere zuzendu dira langileen ordezkariak manifestazio amaierako ekitaldian, konpromiso gehiago eskatuz. Patronalaren bozeramaile izateari uztea eskatu diote Eusko Jaurlaritzari, eta Tubacex bezalako enpresei emandako diru-laguntzen gaineko azalpenak ere eskatu dituzte.