COVID-19ak erabat baldintzatu du eskualdeko kirol talde gehienen jarduna, baina badaude baita pandemiak bultzatuta sortutako ekimen berriak ere. Horietako bat da Aiara Berri areto futbol taldearena.
Amurrio eta Urduñako 16 lagunek osatzen dute egitasmoa, 15 jokalarik eta ordezkari batek. Gehienek Amurrioko talde batean jokatzen zuten iaz, baina pandemia hasi zenean, berezko bidea jorratzea erabaki zuten, “errutinak eragindako asperdurak” bultzatuta.
Helburu nagusiarekin sortu zuten taldea; erabakiak euren kabuz hartzeko gaitasuna izatea. “Gure helburua Aiaraldean areto futbola sustatzea da”, azaldu dute Aiara Berriko kideek, “horrez gain, epe ertainera bigarren talde bat izatea nahiko genuke, baina lehenik eta behin igoera lortu beharko genuke, bigarren talde hori lehiatu dadin”.
Sare sozialetan jarri dute indarra Aiara Berriko kideek. Partidak zuzenean emititzen dituzte astebururo, Instagram bidez
Aurtengo helburua, igoera
Gauzak hala, aurten igoera lortzea dute xede, eta asmo horrekin hasi dute liga, baina ondo hasi ere, lehen bi partidak irabazi baitituzte.
Pandemiaren erdian sortutako taldea izanik, “ohituta” daude jokalariak birusaren zabalpena ekiditeko neurrietara. “Irailean, entrenamenduetara itzuli ahal izan ginenean, egoera arraroa zen hasieran. Legea betetzeko, honek ezarritako baldintzera egokitu behar izan dugu”.
Arrazoi horregatik, ezin izan dituzte buruan zituzten zenbait egitasmo egin. “Pandemiak eraginda, egin nahi genituen hainbat ekintza bertan behera utzi behar izan ditugu, udako lagunarteko txapelketa tartean”. Zehaztu dutenez, bi helbururekin egin nahi zuten ekimen hori: areto futbolari ikusgarritasuna ematea eta taldearentzako dirua lortzea.
Gauzak hala, sare sozialetan jarri dute indarra Aiara Berriko kideek. “Astebururo, gure partiden emanaldiak zuzenean eskaintzen ditugu gure Instagram kontuan”, zehaztu dute, “aurtengo partidak ateak itxita direla kontuan izanda, gure taldea ikusteko aukera paregabea eskaintzen dizuegu”.