Zenbait hedabidek jakinarazi dute Tubacex taldeko arduradunak harremanetan jarri direla euskal erakundeetako hainbat ordezkarirekin, euren babesa eta elkar ulertzea eskatzeko. Enpresak berretsi du bere apustua herrialdearekin eta errepikatu du ez duela atzera egingo kaleratzeetan.
Finean, Jesus Esmorisek sinatutako dokumentuak sindikatuak egiten ditu egoeraren errudun, soldatak jaisteari uko egin diotelako. Berez, zuzendariak adierazi du 129 langile botatzeko erabakia bere borondatearen aurka hartu duela, pandemiak eta energia berriztagarrien aldeko apustuak merkatuan sortutako joeraren ondorioz.
Tubacex taldeko zuzendariak adierazi die euskal erakundeei euren babesa behar duela eta ez duela asmorik atzera egiteko kaleratzeen aferan
Edonola ere, enpresako arduradunek azpimarratu dute kaleratzeak epaileen esku daudela eta eurek ez dutela iritzia aldatuko. Horrez gain, Tubacexek berriro adierazi du grebak zalantzan jartzen duela Amurrio eta Laudioko lantegien etorkizuna eta horri gehitu dio "komunikazio toxiko eta anonimoak" heltzen ari direla euren bezeroetara.
Gutxiengo zerbitzuak kendu
Enpresak komunikazio hori zabaltzen zuen bitartean ordezkari publikoen artean, langileei azaldu zien ekoizpeneko gutxiengo zerbitzuak bertan behera geratuko direla hurrengo astetik aurrera.
Tubacexeko gutxiengo zerbitzuak etengo dituzte ekoizpenean, ezin baitute aurreikusi noiz ekingo dioten berriro produkzioari
Ainhoa Rivera giza baliabideetako arduradunak sinatutako mezuak aitortzen du ezin dutela aurreikusi noiz hasiko diren berriro produzitzen eta uda ostean egiten den abiada estandarrak ez duela balioko.
Izan ere, udan egiten den geldialdia nabarmen gainditu du 2 hilabeteko grebak. Alegia, ekoizpena berreskuratzen denean, apurka-apurka egin beharko dute, makina guztien funtzionamendua berrikusteko.