Zaraobeko ikasleek egurrezko etxolak egin dituzte Urduñako animalien aterperako

Urtebete darama martxan, La Rondina futbol zelai zaharrean, Urduñako animalien aterpea. Orain, txakurrentzako eta katuentzako zenbait babesleku prestatu dituzte, Zaraobe Institutuko zurgintza moduluko ikasleekin elkarlanean.

Duela urtebete abiatu zuten El refugio de los Sabios, Urduñako animalien babeslekua. La Rondina industriaguneko futbol zelai zaharrean atondu zuten horretarako espazioa eta animalia ugari igaro dira bertatik dagoeneko. Lan boluntarioari eta udalarekin izandako elkarlanari esker egin dute aurrera, eta orain Zaraobeko ikasleen laguntza ere jaso dute.

Izan ere, ikastetxeko zurgintza moduluko ikasleek txakurrentzako 8 etxola eraiki dituzte. Atzo bertan jaso zituzten babeslekuko arduradunek. Aiaraldea Hedabideari azaldu diotenez, "oso baliagarriak izango dira eraikuntza horiek, babeslekuko txakurrei aterpea eskainiko baitiete".

9 dira gaur gaurkoz dauden txakurrak, baina askoz gehiago ere igaro dira bertatik. Txakurrak ez ezik, bestelako animaliak ere artatu dituzte: Zaldiak, astoak, katuak... Hain zuzen, zenbait katu kolonia dituzte hiritik barreiatuta, elikadura egokia jasotzen dutela ziurtatzen dute. Zaraobeko zenbait etxola kolonia hauetakoren batera bideratzea pentsatu dute: "kaleko katuentzako erreferentzia guneak ditugu hainbat auzoetan, eta bizilagunen laguntza daukagu hauei jaten emateko modu egokian".

Ikasleekin elkarlanean

Babeslekuko boluntario batek luzatu zion Zaraobe Institutuari elkarlanean proiektua garatzeko aukera, eta segituan hasi ziren lanean. Zurgintza moduluko bigarren mailako ikasleak bi hilabete egon dira proiektuan murgilduta: ereduak bilatu, planoak diseinatu, egurra landu eta margotu egin dute.

Oso pozik agertu dira ikastetxeko kideak lortutako emaitzarekin, eta esperientzia errepikatzeko gogoa dutela adierazi dute: "Lehenengo aldia da institututik kanpo elkarlanean horrelako lan bat gauzatzen dugula. Orain arte ikastetxeko azpiegiturak atondu ditugu moduluetako ikasleok, baina esperientzia hau aurrekari polita da eskualdeko gainerako eragileekin elkarlanean aritzeko".

Urduñako Udalaren laguntza

Urduñako Udaleko ordezkariak ere izan egon ziren atzo Zaraobe Institutuan txakurren etxolak jasotzen. Animalien babeslekua abiatu zutenetik, hainbat azpiegitura eta laguntza eskaini izan du erakundeak, eta oso eskertuta azaldu dira babeslekuko kideak. Elkarlanean ari dira zerbitzua eskaintzen, lan boluntarioa oinarri.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide