Gaztela eta Leongo Gobernuak Gorobel mendilerroan bi parke eoliko egiteko proiektua aurkeztu du aste honetan autonomia erkidegoko aldizkari ofizialean. Aerosorgailuak jartzeko interesa duten enpresek hilabeteko epea dute orain proiektuak aurkezteko.
'Pico del Fraile' eta 'Llorengoz' dira Gaztela eta Leonek Gorobelen aurreikusi dituen parke eolikoen izenak. Lehenengoak, 'Pico del Fraile'-k, 10 aerosorgailu izango lituzke Angulo mendatetik hasita, Carbonilla mendilerroan barrena, Artziniega gainean, hain zuzen.
Llorengoz parke eolikoan, Gaztela eta Leon eta Arabaren arteko muga jarraituz, 11 aerosorgailu aurreikusi dira, Tologorri, Mojon Alto eta Kobata inguruan.
Kontrako iritziak
Apirilaren 20an aurkeztu zuen Gaztela eta Leongo gobernuak proiektuaren zirriborroa, eta dagoeneko agertu dira honen kontrako iritzi eta argudioak. Merindadeetako (Burgos) eskualdeko talde ekologistek salatu zuten proiektua lehenbizi: "Bioaniztasunari kalte larriak eragingo dizkio proiektuak eta, gainera, Merindadeetako herritarron bizkar hartutako erabakia da".
Gorobeleko basozain ugari ere aurka azaldu dira, parke eolikoak eraikiko diren inguruak hegaztien babeserako espazioak baitira, "sai arre, sai zuri eta belatz askoren habiak aurkitzen dira bertan".
Aiaraldean, Mendiko Lagunak taldeak salatu du proiektua. "Trantsizio ekologikoaren izenean, natura eta bere bioaniztasuna suntsitzen ditugu? Energia berriztagarriak bai, baina ez edozein preziotan. Mendiak ez daude salgai", adierazi dute sare sozialen bidez.