Oroko haitzetako eskalada eremuan biderik ez zuen ezporoi batean hiru eskalada bide zabaldu dituzte Joxe Blanco eta Alfredo Hernandez aiaraldearrek.
Udazkenean eskalatu zuten aurrenekoz Izan Bidea Tontorreraino eskalada bidea, V+ zailtasunarekin kalifikatu zuten. Bi mendizaleen esanetan “kutsu alpinoko 45 metroko bide honek ez du parekorik kirol estiloko bideak nagusi diren Oroko eskalada eremuan”.
Ordutik errepikapen asko izan ditu, “izaera berritzaile horren arrakastaren adierazle” Blanco eta Hernandezen arabera.
Bi bide berri
Eskalada lerroaren egokitze lanetan ari zirela aukera berriak atzeman eta otsaila-martxoa bitarte bide berriak zabaltzeari ekin diote: Alaitz (45m / IV+) eta Amnistia (40m / VI). Goiko bilgune amankomuna dute bideek, eta segurtasun instalakuntza paraboltez osatuta dago, hiru katedun bilgunez lagundurik.
Gauzak horrela estilo alpinoko sektore oso bat da bi aiaraldearrek Oroko haitzetan sortutakoa. Izan Bidea izenarekin bataiatu dute sektorea, eta Sabai Handi delako sektorearen amaieran aurkitzen da. Bi eskalatzaileek bideen krokisa biltzen duen txarteltxoa ere jarri dute inguruan.