Tubacex taldeak publiko egin ditu 2021eko lehen hirulekoko emaitzak. Konpainiak 86,5 milioi euroko salmentak gauzatu ditu, hau da, iaz tarte berean -pandemia garaia hasi baino lehen- saldutakoaren %57. Taldeaaren aburuz, petrolio eta gasaren sektoreak bizi duen krisialdiak eragin du hori, eta behin eta berriro errepikatu du ez dela behin-behineko egoera, baizik eta deskarbonizazio prozesuaren eragina.
Jesus Esmorís kontseilari delegatuak berak adierazi du 16,4 milioi euroko emaitza negatiboarekin itxi dutela hiruhilekoa.
Zorra handitu
Konpainiak jakinarazi du zorrak gora egin duela 12,3 milioi eurotan ez ohiko bi gertaeren ondorioz. Horrela izendatu dute 600 langileren kaleratzea (129 Aiaraldean). Tubacexek gastu horri leporatu dio zorraren gorakada, eta, neurri txikiagoan, Indian erositako enpresari ere; Prakash.
Mezu kontraesankorrak
Datuak positiboak ez izan arren, Tubacexek ziurtatu du dirutza duela gordeta oraindik eta 189,6 milioi euroko kutxa matentzen duela.
Grebari aipamen bakarra
Laudio eta Amurrioko Tubacexeko lantegiek 90 egun bete dituzte jadanik greba mugagabean, baina enpresak egin duen adierazpenean, aipamen bakarra dago horri buruz.
Alegia, konpainiak esan du bigarren hiruhilekorako aurreikusi duela emaitzak antzekoak izango direla, "baina apurka-apurka gure unitate produktiboak jarduera mailak areagotzen ari dira eta progresiboki normaltasuna berreskuratu beharko lukete, lantegi espainiarretan salbu, greban daudelako".