Eusko Legebiltzarrean lantzen ari den Aiaraldeko suspertze sozioekonomikoaren inguruko ponentzian parte hartu du LABek, eta oharra plazaratu du horren ostean, hainbat aldarri mahai gainean jartzeko.
Sindikatuak “argi” utzi nahi izan du enplegu suntsiketa gelditzeko “premiazko ekintzak” eta “eskualdearen etorkizuna bermatzeko neurriak” behar direla. LABeko kideek uste dute instituzioek Aiaraldearekiko duten zorra “kitatu” behar dutela, eskualdea urte luzez alde batera utzi dutela argudiatuta.
Gauzak hala, zonaldearen etorkizunean inbertitu behar dela nabarmendu dute, azken urteetan pairatutako desindustrializazioa geldiarazteko eta beste sektore batzuk ere bultzatzeko: “sektore publikoa, zaintza, lehen sektorea, merkataritza eta ostalaritza...”.
Eskualdean dauden hainbat errealitate eraman ditu LABek ponentziaren bilerara: Enpresek eta langileek bizi duten egoera, enpresa txiki eta ertainak eta autonomoek bizi duten errealitatea edota gazteena, besteak beste. Horren aurrean, erakundeen “konpromisoa eta inplikazioa” beharrezkoak direla nabarmendu du sindikatuak. “Onartezina da ezer ez egitea edo zikoizkeriagatik bakarrik mugitzen diren enpresa-zuzendaritzek enplegua suntsitzeko hartutako neurriak babestea. Aiaraldean ezin da enplegu gehiago suntsitu, berehalako konpromisoak eskatzen ditugu Aiaraldearentzat enplegu duina eta kalitatezkoa lortzeko”.
Inbertsioak azpiegitura eta zerbitzu publikoetan
Horrez gain, beste gauza bat ere eskatu dute LABeko kideek: “oinarrizko azpiegitura eta zerbitzu publikoetan inbertsioak egitea”. Osasunean, zaintzan, garraio publikoan eta saneamenduan jarri dute arreta. “Murriztuta dauden zerbitzuak hobetu behar dira, eta zerbitzu desberdinak zabaldu, kalitatezko zerbitzu publikoak lortzeko”.
Hala ere, ohartarazi dute enpresei ezin zaizkiela diru-laguntzak eman trukean ezer eskatu gabe: “Enpresek laguntza publikoak edo zerga-salbuespenak jasotzen badituzte, kontrapartidak izan behar dituzte, hala nola enplegua mantentzea”.
Aiaraldea “alerta gorrian” dagoela nabarmendu du sindikatuak, eta beharrezkotzat jo du “eskualdearen etorkizunaren alde eta bertan enplegu eta bizimodu duina izatearen alde jardutea”.