Atletismoko lehiaketak itzuli dira EAEra eta Aiaraldeko kirolariek emaitza oso positiboak eskuratu dituzte azken asteetan. Momentuz, pistetan gauzatzen diren probei soilik eragiten die baimenak. Hortaz, norgehiagoka herrikoiak edo jendetsuak ezin dira antolatu oraindik.
Hala ere, Arabako eta Euskadiko Txapelketak egin dituzte maiatzean eta nabarmentzekoak izan dira Laudio Atletismo Klubeko eta Oinkariak taldeko kideen emaitzak.
Naia Laso Gonzalez 3. izan zen Euskadiko Txapelketan 20 urte azpiko kategorian, maiatzaren 8an. 1.500 metroko proban lehiatu zen.
Maiatzaren 15ean Arabako Txapelketa jokatu zen Gasteizen eta 10.000 metroko proban aiaraldearrek hartu zuten podiuma: Koldo Ayesta izan zen lehena, Jon Ander Crespo bigarrena eta Jon Llano hirugarrena. Laugarren postua David Castrorena izan zen, bosgarrena Alberto Vacelarena eta bederatzigarrena Kepa Urkijorena. Pablo Masek eta Mikel Aingeru Letonak ezin izan zuten lasterketa amaitu. Arabako Txapelketan ere Arrate Talledo bigarren sailkatu zen 300 metrotan eta Onintze Rodriguez bosgarren geratu zen. Alturako saltoan Aiara Larrazabal bigarren izan zen, 1,20 metroko jauzia eginda.
Maiatzaren 16an Euskadiko Txapelketen txanda heldu zen. 5.000 metrotan Tomas Laso izan zen txapeldun, Master 50 kategorian. Josu Apraizek hirugarren postua lortu zuen Master 40 kategorian. Galder Hernandez seigarren izan zen proba berean. Apraizek urteko markarik okerrena egin zuen aurtengo denboraldiari dagokionez; baina, lasterketa oso gaizki hasi zuela kontuan hartuta, pozik dagoela adierazi du. 1.500 metroko esparruan Iñaki Galindez izan zen hirugarren Master 40 kategorian eta emaitza bera erdietsi zuen Edu Frutosek Master 50ean.
COVID-19aren kontrako protokoloak jarraitu dituzte lasterketa guztietan. Horrek esan nahi du ez dela publikorik egon, tenperatura hartu zaiela kirolari zein epaileei, aldagelak ez dira erabili eta maskara derrigorrezkoa izan dela proba hasi arte.