Pasa den astean bilera egin zuten Tubacexeko ordezkari sindikalek eta zuzendaritzak eta emaitzak ez ziren emankorrak izan. Grebalariek piketeei eusteko konpromisoa berretsi zuten eta handik eta egun gutxira etorri da enpresaren erantzuna.
Atzo hainbat hedabidek zabaldu zuten Jesus Esmoris kontseilari delegatuak berak langileei bideratutako eskutitza eta mezua hitz lasaigarriekin hasten bada ere, ez da zaila sumatzea grebaren kontrako torpedoa jaurtitzen saiatu direla enpresatik.
Hitz goxoen atzean, mehatxua
Esan bezala, Esmorisen testua ahalik eta modurik baketsuenean hasten da, baina Tubacexek mantendu duen diskurtsotik koma bakarra aldatu gabe. Hau da, kaleratzeak merkatuaren aldaketa estrukturalaren ondorioa direla eta hori ez dela inoren errua, ez zuzendaritzarena, ez langile kaleratuena.
Hori esan ostean, kontseilariak argi eta garbi esaten du eurentzat egun dagoen arazo bakarra greba dela. Horrekin bukatu beharra dagoela nabarmentzen du eta horretarako maiatzaren 31n agortuko den proposamena iradokitzen du.
Zuzendaritzaren proposamena, nola ez, ohiko portaerara itzultzen da. Eskaintza itxia da, ezin dena ukitu, eta langileek maiatzaren 31ra arte baino ez dute izango baiezkoa emateko.
Proposamena: kaleratzeak onartu, lanera itzuli, gutxiago kobratu
Gauzak horrela, Tubacexek mahai gainean jarri duenak hiru ildo ditu:
- Kaleratzeak mantendu. Gehienez, lanposturik gabe geratu direnentzat 5.000 euro aurreratzea planteatzen du enpresak. Hori ez litzateke inolako oparirik izango, epaiketa bukatu ostean, baliatuko baititu enpresak kalte-ordainari aurre egiteko. Alegia, epaiak diru kopuru handiagoa ezartzen badio Tubacexi langile bakoitzeko, osatu beharko du 5.000 euro horietatik gora. Gainera, kaleratuen itzulerari dagokionez, Esmorisek "borondatea" aipatzen du bakarrik. Hau da, ez du inolako bermerik ematen. Zentzu horretan, "konpromisoa" litzateke barne promozio bidez betetzen ez diren kontratazioen erdia kaleratuei eskaintzea. Aintzat hartzen bada Tubacexek aipatzen duela sekulako krisialdia egongo dela, ez dirudi horrelako kontrataziorik egongo denik. Ahaztu ezin den beste alde bat da, itzulera horietan, enpresak berak hautatuko lituzkeela beharginak eta euren lan baldintzak banaka negoziatuko liratekeela, hau da, lan hitzarmenetik kanpo. Gainera, kaleratzeen eta grebaren inguruan Esmorisek iradokitzen du epaiketa amaitu arte -alde biek helegitea jarriko baitiote lehen epaiari- hainbat hilabete igaro daitezkeela (2022ko hasiera) eta hori ez dela bideragarria enpresarentzat. Hortaz, lanuztea amaitzea da lehen exijentzia.
- Soldatak murriztea: 2021ean agortuko da indarrean dagoen lan hitzarmena eta Tubacexeko zuzendaritzak nahi duena bistakoa da: Kaleratzeak aprobetxatu lan baldintzak okertzeko. Modu orokorrean, soldata igoerarik ez dela egingo ziurtatzen dute eta zehaztasun gabeko adierazpenak egiten dira, oinarrizko soldatak eta landaldiak aipatuta, argitu gabe horrek zer esan nahi duen.
- Enplegua bermatzea? Tubacex taldeak dio egungo langile kopurua ez dela murriztuko, baina aintzat hartu beharra dago hori esaten duela 329 langile kalean utzi ostean: 200 behin-behinekoak eta 129 finkoak. Hortaz, ez dirudi ahalegin handia denik.