Adierazpen bateratua plazaratu dute Aiaraldeko eskola publiko guztietako zuzendaritzek, Hezkuntza Sailak maiatzaren 20an iragarritako Zabaleko eta Mendiko ikastetxeen fusioa dela eta.
Adierazpenaren sinatzaileek “babes osoa” helarazi nahi izan diete Zabalekoko eskola-komunitateari, eta ikastetxe horren proiektua goraipatu dute, “auzoaren ardatza” bilakatu dela iritzita. “Bertan elkarbizitza, euskara, inklusioa, aniztasuna, gure kultura, berdintasuna… lantzen dira auzokideekin batera. Auzo bizia izan da eta bada San Jose, sorreratik eta gaur egun ere, etorri berri askoren harrera gune”.
Gainera, azpimarratu dute San Jose auzoko zentro horrek zuzendaritza-proiektua aurkeztu duela datozen lau urteetarako, “konpromezua, lidergoa eta inplikazioa erakutsiz eskola-komunitatearekin”.
Eskualdearen egoera ekonomikoa ere izan dute hizpide, Valvospain, Lidl edota Tubacexeko kasuak aipatuta. Hori dela eta, Aiaraldean “inbertsioak” egiteko garaia dela nabarmendu dute, “ez zerbitzu publikoak murriztekoa”. Ohartarazi dutenez, Zabaleko desagerraraziz gero, “Amurrion hezkuntza publikoaren eskaintza Lehen hezkuntzan ikastetxe bakarrera mugatuko litzateke”.
Prozesu osoak izan duen “inprobisazio itxura” ere deitoratu dute ikastetxeek, “kaltegarria” delako Eskola Publikoaren irudirako.
Gauzak hala, fusioa bertan behera uztea eskatu diote Hezkuntza Sailari, eta ikastetxe publikoetan “behar diren baliabideak” jartzea.
12 ikastetxek sinatu dute manifestua:
- Arteko Gure Ama HLHI
- Etxaurren Ikastola HLHI
- Okondo HH
- Zaraobe Institutua BHI
- Fabian Legorburu HLHI
- EPA Laudio-Amurrio
- Urduña Herri Ikastetxea
- IES Laudio BHI
- Mendiko Eskola HLHI
- Latiorro HLHI
- Lamuza HLHI
- Orozko Harana Eskola