Iragan maiatzaren 13an sortu zen ofizialki Nerbioi-Ibaizabal Mankomunitatea. Bederatzi udalerrik sortu dute erakundea, Aiaraldeko lauk tartean: Urduña, Orozko, Arakaldo, Arrankudiaga-Zollo, Zeberio, Ugao-Miraballes, Arrigorriaga, Zaratamo eta Etxebarri. Azken udalerri horretako alkateordea, Miguel Angel Herrero, izendatu zuten presidente, aho batez.
Mankomunitateak jarraipena emango dio orain arte Udaltalde 21ek abiatutako bideari. Udaltaldeko presidentea izan da Herrero orain arte. Gauzak hala, bere kudeaketari jarraipena emateko eskaini diote mankomunitatearen gidaritza, Txutxi Ariznabarreta Arrankudiaga-Zolloko alkateak azaldu duenez: “Bera dago hondakinen bilketa eta kudeaketarako lizitazioa kudeatzen eta berak ezagutzen ditu zerbitzu horiek sakonean”.
Adostasuna nagusi
Mankomunitatearen sorrera prozesuan adostasuna izan da nagusi, Ariznabarretaren hitzetan: “Udalek ahalegin handia egin dugu mankomunitatearen sorrera prozesua normalizatu eta bere lehen ibilbidea adostasunez egiteko”.
Iritzi berekoa da Jabi Asurmendi. “Nabarmentzekoa da nola adostasun zabal batera heldu garen prozesu osoan udal eta indar politiko ezberdinen artean, bidean ateratako eztabaidak eta desadostasunak gaindituta”, azpimarratu du Arakaldoko alkateak.
Udalerri txikientzako tresna
Mankomunitatearen sorrerak “tresna ekonomiko-finantziario” gehiago emango dizkie udalerriei, Pedro Mari Intxaurraga Orozkoko alkatearen hitzetan. “Orozkoren kasuan, hondakinak biltzeko zerbitzua jasangarriagoa izango da. Izan ere, bilketa sistema lurpetik lurrazalera lekualdatuko da eta zaborra alboetatik kargatuko dute kamioiek”.
Horrez gain, udalerrien arteko elkarlana sustatzeko balioko du erakundeak, Itziar Biguren ustez. “Hemendik aurrera mankomunitatearen izenean burutuko diren lan guztiak erraztasun handiagoarekin egin ahal izango dira, zentzu ekonomikoan zein barne-antolamenduari dagokionez”, nabarmendu du Urduñako alkateak.