Egun bizia izan zuten atzo Aiarako Suhiltzaileek. Izan ere, larrialdiko bi esku hartze izan zituzten. Hasteko, 15:30ak aldera dei bat jaso zuten autopistan, Aretako ordainsaritik gertu eta Bilboko noranzkoan, kamioi batek "artaziarena" egin zuelako.
Gidariak mina hartu zuen bizkarrean eta suhiltzaileek atera behar izan zuten ibilgailutik. Horrez gain, nitrogeno likidoa garraiatzen zuen gizonezkoak. Baina, zorionez, hutsik zegoen kamioia, elementu arriskutsua baita nitrogenoa.
Eraztuna
Eguna amaitzeko gutxi geratzen zenean, 23:15ean, Amurrioko anbulatoriotik jaso zuten deia suhiltzaileek. Antza, gazte batek atzamarra puztuta zeukan eta ezin zuen eraztuna kendu. Zerbitzu medikuak saiatu ziren euren kabuz afera konpontzen, baina ezinezkoa izan zitzaien.
Ondorioz, Laudioko suhiltzaileen parkera joan zen gaztea. Lana uste baino konplexuagoa izan zen.Hasteko, izotza eta ur hotza baliatu zuten atzamarraren tamaina murrizteko. Gero, barra bat sartu zuten eraztunaren azpian eta zerra borobil txikiarekin mozteari ekin zioten.
Edonola ere, makinak eraztuna berotzen zuenez, ur hotza eta izotzak erabiltzen jarraitu zuten objektua guztiz moztu arte.