Atzo, munduko hainbat txokotan bezala, eguzki eklipsea ikusteko aukera egon zen Aiaraldean. Ordea, edonork ezin zuen bere kasa egin, iragazkiak beharrezkoak baitziren begiak ez mintzeko.
Fenomenoaren lekuko pribilejiatua izan zen Urtzi Odriozola. Astronomia zaleak aurreko egunetan bere lagun Pablo eta Sareri eskatu zien balkoia. Eurek utzi zioten kokalekua eta oso eskertuta dago horregatik. Izan ere, bere etxekoak ez du ekialdera jotzen eta eguzkia hego-ekialdera begira egongo zen eklipsearen unean.
Gauzak horrela, tresneria prestatu eta balkoian jarri zuen. 11:00ak aldera hasi zen eklipsea eta ordurako Odriozolak bazuen bere teleskopio refraktorea zain, iragazkiarekin -bestela eguzkiaren argiak erreko luke kamara- eta tripode motorizatuarekin. Azken tresna horrek ahalbidetzen du planetaren errotazioaren kontrako norabidea jarraitzea teleskopioak eta, ondorioz, eguzkia planotik kanpo ez geratzea.
Odriozolak honakoa nabarmendu du: "Iragazkiak eguzkiak sortzen duen argiaren %99 oztopatzen du, hau da, argazkiak jasotzen duena da astroaren fotosferako gainazala. Ez dira ikusten sugarrak, horiek grabatzeko oso makina berezi eta garestiak behar baitira".
Egileak gaineratu du ilargiaren errotazioak eguzkiarekin bat egitean lurtarron ikuspegitik sortzen dela eklipsea, "baina Euskal Herrian ilargiak ez zuen eguzkiaren zati handia estali, ez behintzat munduko beste lekuetan bezain beste".
Behin eklipsea jasota, Odriozolak irudiak landu zituen -time lapsea zein argazkiak- eta sare sozialetan zabaldu ditu.
Egun on! Atzoko eguzki eklipsea, GIF batean. Balkoiko sabaian ezkutatu zen arte ateratakoa #EguzkiEklipsea #SolarEklipse2021 #AstrografiaBalkoitik pic.twitter.com/D4G2ayuW7j
— Urtzi Odriozola (@urtzai) June 11, 2021