Greba mugagabearen 131. egunean, justiziaren eskuetara iritsi da Tubacexeko zuzendaritzak aurkeztutako Enplegua Erregulatzeko Espedientea. Amurrio eta Laudioko lantegietan ezarritako kaleratzeak aztertuko dituzte gaur eta bihar artean.
Gaurkoan, Garbiñe Biurrun presidente duen Justizia Auzitegi Nagusiko Areto Sozialean, TTIko kaleratzeen baliogabetasuna eztabaidatuko dute epaileek. Biurrunek hainbatetan defendatu du tankera honetako kaleratzeen baliogabetasuna, eta aretoak posizio hori bera defendatu zuen PCB-ITP Aeroko kaleratzeen kasuan, esaterako.
Enpresa Batzordea, baikor
Enpresa Batzordeak agerraldia egin du 9:30ean, epaitegi barrura sartu aurretik. Baikor azaldu dira datozen bi egunetan luzatuko den prozesu judizialarekin. Adierazi dute oso argi geratu dela enpresak neurri estrukturalak aplikatu nahi izan dituela egoera koiuntural bati erantzuteko. Horregatik espero dute epaileen ebazpena langileen aldekoa izatea.
10:00ak aldera sartu dira Enpresa Batzordeko ordezkariak epaitegi barrura, Tubacexeko ehunka lagunen txalo zaparradaren artean. Aiaraldeko lantegietako grebalariak ez ezik, Tubos Reunidos, Novaltia, PCB-ITP Aero, Bilboko Argiak edota Petronorreko langileak ere egon dira Justizia Jauregiaren aurrean euren elkartasuna adierazten. Izan ere, langileen aldeko ebazpen batek aurrekari garrantzitsua ezarri lezake Euskal Herrian abian dauden beste lan-gatazketan.
Aceralava
Bihar, Amurrioko Aceralava lantegian ezarritako kaleratzeen txanda izango da. Tubacexeko grebalariek Bilbora martxa antolatu dute, 6:00etan Laudioko piketetik abiatuta, eta 11:00etan Justizia Jauregiaren aurrean mobilizatuko dira berriro.