AIARALDEA HEMEN

Zabaleko eskolako hizkuntza klaseak eta dantza bertikala, hamabostekariaren azken zenbakiko protagonistak

Hainbat gai jorratzen ditu hamabostekariak. / Aiaraldea.eus

Gaur argitaratuko da Aiaraldea Hemen hamabostekariaren 146. zenbakia. Ikasturteko azken hamabostekaria izango da, irailera arte ez baita berriro argitaratuko. Gehigarri berezia topatuko du irakurleak alean, uztaileko kultura agendarekin.

Amurrioko Zabaleko eskolako hizkuntza klaseek hartu dute Aiaraldea Hemen hamabostekariaren ikasturteko azken zenbakiaren azala. Horrez gain, bestelako erreportaje eta elkarrizketak lantzen ditu agerkariak, gehienak Aiaraldea.eus atarian argitaratu gabeak oraindik.

Dantza bertikala praktikatzen duen Janire Etxabe Arrankudiagako bizilagunari egindako elkarrizketa zabala dakar zenbakiak. Uxue Mendia eta Iñaki Bea futbolariekin izandako solasaldiak ere aurkituko ditu irakurleak, baita Ugaitz Agirre idazleari egindakoa ere.

Selektibitatea

Unibertsitatera Sartzeko Ebaluazioaren bigarren deialdia egitear den honetan, Aiaraldea Komunikabideak azterketa lehen deialdian egin duten zenbait ikasleren lekukotzak jaso ditu. Guztiek jarri dute ezbaian gaur egungo ebaluazio sistema.

Analisia

Tubacexeko lan gatazka agertoki berri baten atarian aurkitzen da. Iragan asteko kaleratzeen aurkako epaiketek, akziodunen bilkurak edota Eusko Legebiltzarreko saioak eszenatokia eraldatu dute greba mugagabeak 140 egun bete dituen honetan. Aiaraldea Hemen hamabostekarian gaiaren inguruko erreportaje sakona aurkituko du irakurleak.

Gehigarri berezia

Ikasturteko azken zenbaki honek gehigarri berezia dakar. Izan ere, pandemia egoerak ez ditu herri eta auzoetako jaiak eta bestelako ekimenak gelditu, eta uztaileko kultura egitarauaren agenda osatu du Aiaraldea Komunikabideak, eskualdeko herritar guztien eskura egon dadin.

Banaketa puntuak

Datozen egunetan banatuko da hamabostekaria eskualdeko saltoki, ikastetxe eta kaleetan. Honako banaketa puntu hauetan topatu daiteke, besteak beste:

  • Aldai plaza (Laudio)
  • Abasto plaza (Laudio)
  • Luiaondoko supermerkatua
  • Laudioko kiroldegia
  • Artziniegako frontoia
  • Atxetako Dia
  • Amurrioko Eroskia
  • Orozkoko frontoia
  • Urduñako supermerkatuak
  • Faktoria (Laudio)

 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide