Aiarako Kuadrillak 6 truke-kutxa jarri ditu eskualdean. Aintzane Arbaizagoitia ingurumen teknikariak azaldu du horien helburua dela objektu txiki eta ertainen (arropa, jostailuak, liburuak, gailu elektriko eta elektronikoak, filmak...) erabilpena luzatzea, birziklapena sustatu baino. "Hobe da hondakinak ez sortzea, gauzen bizitza luzatzeko aukera badago", argitu du teknikariak.
Egitasmoaren aurkezpena egin zuten atzo Encina Castresana Aiarako Kuadrillako presidenteak eta Ander Larrinaga Laudioko alkateordeak "Aiaralde Zirkularra" lelopean. Berez, Truke-kutxak armairuak dira eta barruan laga daitezke norberak baliatzen ez dituen baina oraindik erabilgarriak diren tresnak.
Zehazki, hurrengo kokaguneak prestatu ditu Aiarako Kuadrillak:
- Laudio: Lamuza parkeko Etxe Nagusian eta Aretako Kultur-Etxea.
- Amurrio: Udaletxean, San Jose,
- Aiara: Luioandoko Gizarte Zentroan, La Torre 2
- Artziniega: Liburutegian, Elizako kantoia
- Okondo: Kultur-Etxean, Villachica 29
Aplikazioa sortzen ari dira
Ander Larrinagak jakinarazi zuen Truke-kutxek iragarki taula izango dutela, norberak bere eskaintzak edo eskariak egiteko. Hala ere, Internet bidezko aplikazioa garatzen ari da kuadrilla eta Encina Castresanak aurreratu zuen espero dutela uda osterako prest egotea.
Tamaina handiagoko tresnak
Truke-kutxa objketu txiki eta ertainen berrerabilpenera bideratu badute ere, espero dute jendea animatzea traste handiagoen bizitza ere luzatzera. Horretarako, berrerabilpenerako etxola jarri dute Laudioko Garbigunean.
Aiaralde Zirkularra kanpainaren barruan, gainera, ikastaroak antolatuko dituzte herritarrek ikas dezaten etxeko tresnak euren kabuz konpontzen.