Sei eguzki parkeren sorrera bultzatzeko hitzarmena sinatu dute Arabako Foru Aldundiak eta Energiaren Euskal Erakundeak. Aiaraldean egongo da kokatuta horietako bat eta gainontzekoak Arabako beste txoko batzuetan jarriko dira: Mendialden, Arabako Lautadan, Arabako Errioxan eta Gorbeialden.
Energia kooperatibak eratzea bultzatuko dute proiektua garatzeko, Ekiola kooperatiba eredua jarraituta. Euskal Energia Erakundearen eta Mondragon taldearen artean eratutako proiektua da Ekiola. Kooperatiba bat eratuko da zonalde bakoitzeko (eskualdeakoa Aiarako Ekiola kooperatiba elkartea izango da).
Eredu hori jarraituta, herritarrak “ahaldundu” nahi dituzte, energia sortu eta kudeatzeari begira. “Tokiko kooperatiben eredupean dauden komunitate energetikoek 0 kilometroko energia garbia sortuko dute, sistema elektrikoaren barruan jardungo dute eta tokiko eta gertuko administrazioekin batera arituko dira”, azaldu dute Foru Aldundiko kideek, “emaitzak kooperatibistei itzuliko zaizkie beren faktura elektrikoetan; horrela, urtero ikusiko dute beren instalazioa sortzearen emaitza”.
Parke bakoitzak hektarea bateko hedadura izatea aurreikusi dute, eta megawatt bateko potentzia izango dute. Eguzki plaka guztiak 12 hilabeteren buruan abian egotea aurreikusi du Aldundiak.
Proiektuan parte hartzeko hemen eman daiteke izena.