Caritasek boluntarioak eskatu ditu adingabeak laguntzeko eskola jardueretan

Boluntarioen laguntza ezinbestekotzat jo du Caritasek. / Caritas Tenerife

Erakundeak baliabide urriko familietako seme-alabak lagundu nahi ditu ikasketak gainditu ditzaten. 

Gasteizko Elizbarrutiko Caritasek deia zabaldu du boluntarioak bilatzeko. Deialdi horren helburua da bitarteko ekonomiko nahikoak ez dituzten umeak babestea, ikasketetan arazoak izanez gero.

Caritasen ustez, dauden laguntzak ez dira nahikoak eta horregatik da beharrezkoa boluntarioen ekarpena. Esaterako, iaz Laudion 7 boluntario aritu ziren eta Amurrion 3.

Lan-dinamika honako hau da: ikasteko saio pertsonalizatuak eskaintzea, astean bi edo hiru, banaka edo talde txikietan, ahal dela ikastetxe eta klase bereko kideekin. Jardueran parte hartzen duten boluntarioek ikasteko teknika errazak erabiltzen dituzte: ulermenezko irakurketa, eskemak eta laburpenak egitea, azpimarratzea eta koaderno-zirriborroa erabiltzea, besteak beste. 

Ikasketetan laguntzeko saio bakoitzean boluntarioak saiatzen dira haurra gustura eta konfiantzaz egoteko lan-giroa sortzen, jarrera ona eta errendimendu handiagoa lortzeko. Prozesuan, ikaskuntzaren jarraipena eta ebaluazioa egiten da  (bai ikastetxeetan, bai Caritasen laguntzeko saioetan), eta aldian-aldian familiei jakinarazten zaie, haien berri izan dezaten. 

Caritasen eskola-laguntzako zereginak betetzen dituzten boluntarioek 2. mailako Lanbide Heziketako prestakuntza dute gutxienez. Enpatia, ardura eta jarduera egin ahal izateko zehaztutako egutegia betetzeko konpromisoa eskatzen zaie. Programako boluntario bakoitzari hastapen- eta sakontze-ikastaroak eskaintzen zaizkio, baita lanerako orientabideak eta materiala ere. 

Interesdunek 945 23 28 50 telefono zenbakira dei dezakete izena emateko. 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide