Goizean zehar hasi dituzte bilerak enpresa batzordean ordezkaritza duten sindikatu guztiek . ELAk, ohikoan bezala, San Martin futbol zelaian batzartu ditu afiliatuak, LABek Amurrioko San Anton elizan elkartu ditu sindikatuko kideak, CCOOk Basarteko zelaian egin du bilkura.
STATeko afiliazioa aurka
STAT sindikatuak egindako bozketaren emaitzak eman dira ezagutzera lehenik eta behin. 67 botorekin afiliazioaren gehiengoa akordioaren aurka agertu da, kontrara, STATeko 47 afiliatuk eman dute aldeko botoa.
Sindikatuko arduradunek, ordea, Independienteekin batera, langile guztien bozketa orokor bat eskatu zuten atzo, afiliatuak ez dauden langileek ere iritzia eman dezaten. Hain zuzen ere, arratsaldean egingo dute Independenteek akordioaren gaineko eztabaida, prozedurarekin ez baitzeuden ados, eta bozkatuko duten ere argitu behar dute.
ELA alde
ELA sindikatuak agerraldia egingo du 13:00etan, baina jadanik jakinarazi da bere kideek akordioaren alde egin dutela: 125 alde, 50 kontra, 2 zuri eta boto baliogabe bat.
Tubacexeko sindikatuen gehiengoak, LAB salbu, ontzat eman zuen atzo zuzendaritzak aurkeztutako akordio proposamena. Horrenbestez, afiliatuen batzarrak deitu dituzte gaurko egunean zehar lan-gatazkari amaiera emango liokeen akordio hori berresteko.
Akordio horren arabera enpresak helegitea erretiratuko luke, aitortuta ez zegoela kaleratzeak egiteko arrazoirik, eta enplegua eta inbertsioak 2024ra arte bermatuko dira, zenbait moldaketen truke: Lan orduak 40 orduz handitzea urtean, lan-hitzarmena 2025era arte luzatzea eta soldatak hiru urtez izoztea.
CCOOk dauka giltza
CCOOk arratsaldean emango du aditzera afiliazioaren iritzia. Dagoeneko sindikatuko kide batzuek botoa eman dute goizean, baina arratsaldean jasoko dituzte iritzia guztiak, eta orduan emango dute behin betiko emaitza eta erabakia. Sindikatuko ordezkariek enpresa batzordeko gehiengo zabala akordioaren alde agertzen ez bada, ez dutela hau babestuko adierazi dute batzarrean.
Horrek esan nahi du ELArekin bakarrik ez dutela ituna sinatuko. Horrek, aldi berean, egoera berria sortuko luke, eta CCOOk proposatuko luke langile guztien artean bozkatzea akordioaren sinaketa.
LAB aurka
Aurreikusi moduan, LAB sindikatuak ezezko botoa eman dio akordioari. Sindikatuak iragarri zuen ez zuela ez kaleratzerik ez murrizketarik onartu eta desadostana agertu du 3 puntutan, nagusiki:
- "Akordioan soldatak ia 4 urterako izoztea planteatzen da, 2025ean galdutako erosteko
ahalmena berreskuratuko dugunaren bermerik gabe. - Enplegu-berme bat planteatzen da, langile-kopuruari buruz hitz egiten duena, baina ez
pertsonei buruz. - Eta onartezinena dena: lanaldia 3 urtez lanaldia 40 orduz luzatzea planteatzen du.
Horrek, langileen lan-baldintzak okertzeaz gain, hurrengo 3 urteetan 50 lanpostu baino
gehiago sortzeari uko egitea da. Aiaraldeko eskualdeko lanpostuak dira, eta horregatik
LABek ezin du akordioa babestu".
Independenteek ez dute bozkatu
Sindikatu Independenteak bilera egin du arratsaldean eta ez da bozkatzera heldu. Izan ere, independenteek adierazi dute akordioari buruz Tubacexeko langile orok eman behar dutela iritzia, eta ez soilik afiliatuak daudenak.
Gauzak horrela, bere erabakia izan da bozketa orokorra exijitzea Langile Batzordeari.
Beste bozketa bat?
Esan bezala, gaurko bozketaren ondoriozko gehiengoak ez badira argiak akordioaren alde, oraindik egon daiteke beste aukera langileen artean egoera desblokeatzeko. Hori izango litzateke Tubacex enpresako behargin guztien bozketa antolatzea.
Edonola ere, gaur arratsaldean jakingo da zenbat sindikatuk babesten duten akordioa (ELAk eta CCOOk gehiengoa izango lukete, berez) eta zer nolako jarrera nagusitzen den.