Tubacexek urteko hirugarren hiruhileko emaitza ekonomikoak aurkeztu berri ditu. Duela hilabete batzuk Laudio eta Amurrioko lantegiak desagertzeko arriskuan zeudela iragarri arren, multinazionalak 84,5 milioi euroko irabaziak lortu ditu azken hiru hilabetetan aurreko hiruhileko salmentak %17,6 handituz, eta 500 milioi euroko eskaera-zorroa du datozen hilabetetarako.
Multinazionalak 84, 5 milioi euroko irabaziak lortu ditu azken hiru hilabetetan aurreko hiruhileko salmentak %17,6 handituz
Grebak iraun bitartean ere taldeak irabaziak lortu ditu, Balore Merkatuaren Espainiako Batzordean aurkeztutako txostenen arabera. 2021eko lehenengo bederatzi hilabetetan 246,5 milioi euroko irabaziak izan ditu Tubacexek.
Iaz, epe berdinean, %36,8 gehiago fakturatu zituen. Jesus Esmoris kontseilari delegatuak, ordea, ez dio 236 egunez luzatu den greba mugagabeari aipamen zuzenik egin irabazien beherakada hori azaltzeko.
Zuzendaritzaren hitzetan, merkatuaren gaur egungo egoerak "epe ertain-luzean etorkizunari baikortasunez begiratzeko aukera" ematen dio multinazionalari. Azaldu dutenaren arabera, deskarbonizazio prozesuan eman beharreko urratsek markatuko dute agenda, eta, zentzu horretan Tubacexek paper garrantzitsua beteko duela aurreratu dute.
Berregituraketa
Multinazionalak amaitutzat jo du 2020an abiatutako berregituraketa prozesua. Tubacexek nazioarteko plantilla %20 murriztea zuen helburu, horrek eragin zuen Aiaraldeko fabriketan 129 langile kaleratu nahi izatea.
Arrakastatsutzat jo dute berregituraketa prozesua, eta adierazitakoaren arabera, gaur gaurkoz Aiaraldeko fabriketan bakarrik daude indarrean aldi baterako enplegua erregulatzeko espedienteak.
Jesus Esmorisek berak azaldu du berregituraketa horrek kostu finkoak 35 milioi eurotan murriztea ahalbidetu diola enpresari: "gure egiturazko lehiakortasuna handituz, eta hori ezinbestekoa da aurre egin behar diogun ingurune zorrotz honetan" nabarmendu du kontseilari delegatuak.