Aiaraldeko Euskalgintza Kontseiluak, Gentza Alamillo Aiarako alkateak, Encina Castresana Aiarako Kuadrillako presidenteak eta Maite Alonso Luiaondoko Administrazio Batzarreko presidenteak aurkeztu dute abenduaren 4an ospatuko den Aiaraldeko Euskararen Eguna.
'Euskaraktibatu!' izango da ekitaldiaren leloa eta egun osoko egitaraua ekarriko du Luiaondora. "Eskaintza oparo prestatu dugu, laster ezagutzera emango dugun egitarau zabalarekin: musika, antzerkia, lehiaketak, bertsoak, jolasak, kirola, kultura... Elkarte eta eragile ezberdinekin elkarlanean arituko gara. Festa ereiteko baliatuko dugu, etorriko diren erronka berriei bide emanez eta energia bilduz" adierazi du Aiaraldeko Euskalgintza Kontseiluak.
Musika, antzerkia, bertsoak, kirola eta jolasak izango ditu Aiaraldeko Euskararen Eguneko egitarauak
Izan ere, iaz ospakizunik ez zuen prestatu erakundeak, baina denbora hori hausnarketara bideratu zuen: " Berrantolatu, gogoeta egin eta aurrera begira jarri gara. Gure elkartearen birsortzea eta euskaltzaleon ber-topaketa ospatu gura dugu; zubiak berreraikiz, komunitatea berrindartuz, interpelatuz eta aktibatuz".
Erakunde publikoetako ordezkariek garrantzitsutzat jo dute ospakizuna euskararen erabilera sustatzeko eta eskualdea gorpuzteko.
Helburuak
Azken bi urteko etenaldiaren ondoren, Aiaraldeko Euskalgintza Kontseiluak ospakizuna antolatuko du komunitatea ehuntzen jarraitzeko, aho zapore ona uzteko eta herritarrak eta eragileak euskararen normalizazioan aktibatzeko. Hain zuzen ere, izango da 'Mintzatu, kontsumitu, inplikatu, EUSKARAKTIBATU! Aiaraldea' ekimenaren lelo osoa.
Horretarako, besteak beste, herriko ostalaritzarekin eta merkataritzarekin aurre lanketa egiten ari dira, euskararen normalkuntzan pausoak emateko baliabideak eskaini eta bezeroak euskaraz kontsumitzera animatzeko bidea emanda.