Gaur argitaratu da Aiaraldea Hemen hamabostekariaren 152. zenbakia. Erreportaje mamitsuak ditu agerkariak bere orrialdeen artean. Horien artean mozal legea bezala ezagutu den 2005/4 Herritarren Segurtasunerako Lege Organikoaren inguruko erreportajea lantzen du zenbaki berri honek. Izan ere, lege honen erreforma mahai-gainean dagoen honetan, eskualdean zer nolako eragina izan duen aztertu du Aiaraldea Komunikabideak, datu esanguratsu bat argitara ekarriz: guztira 2.177 aldiz ezarri dituztela zigorrak Aiaraldean lege horretan oinarrituta.
Animalia erasotuen gaiari ere heltzen dio hamabostekariak. Azken urte eta hilabetetan ugariak izan dira pozoiarekin, tranpekin edota suzko armekin erasotutako animaliak. Iragan azaroak 21ean SOS Aiaraldea ekimenak aurkeztutako "emergentziazko puntuen" inguruko erreportajea ere jasotzen du agerkariak.
Emakume* Sortzaileen Azoka
Aiaraldea Ekintzen Faktoriako Bor-Bor feminismo lantaldeak Aiaraldeko Emakume* Sortzaileen azoka antolatu zuen azaroaren 20an, eta eskualdeko 14 sortzaile eta ekoizle bildu zituen Faktorian. 152. ale honek azokari buruzko argazki erreportaje zabala dakar, protagonisten bizipenekin.
Gehigarri berezia
Azkenik, abenduaren 4an Luiaondon Euskalgintza Kontseiluak antolatu duen Euskararen Egunaren inguruko gehigarri berezia aurkituko du irakurleak hamabostekarian. Egitarau zabala prestatu dute, eta gehigarriak eguneko kontu guzti horiek bildu ditu, Luiaondoko zita ahalik eta gehien zukutzeko.
Banaketa puntuak
Datozen egunetan banatuko da hamabostekaria eskualdeko saltoki, ikastetxe eta kaleetan. Honako banaketa puntu hauetan topatu daiteke, besteak beste:
- Aldai plaza (Laudio)
- Abasto plaza (Laudio)
- Luiaondoko supermerkatua
- Laudioko kiroldegia
- Artziniegako frontoia
- Atxetako Dia
- Amurrioko Eroskia
- Orozkoko frontoia
- Urduñako supermerkatuak
- Faktoria (Laudio)