Gaur bozkatu du Eusko Legebiltzarrak, bi urtez landu eta gero, Aiaraldea suspertzeko plan sozioekonomikoaren txostena. Testua osatu duen batzordeak 40 agerraldi jaso ditu. Planak 24 eta 26 milioi euro arteko inbertsioak ekarriko ditu Urduña, Amurrio, Aiara, Laudio, Okondo, Orozko, Arrankudiaga-Zollo, Artziniega eta Arakaldora.
EAJ, PSE-EE, EH Bildu eta PP-Ciudadanos alderdien babesa jaso du ekimenak eta Elkarrekin Podemos abstenitu egin da. Unai Fernandez de Betoño EH Bilduko legebiltzarkidea harremanetan jarri da Aiaraldea Komunikabidearekin azaltzeko bere koalizioari zapore gazi-gozoa utzi diola azken emaitzak, baina, aldi berean pozik daudela zenbait ideia txertatu dituztelako. Adibidez, Nerbioiko parke lineala, sukalde zentrala, hiltegiak edo kultura suspertzeko plana EH Bilduk proposatu ditu.
Inbertsioak
Gaur onartu den testua izango da oinarria talka plana eta plan estrategikoa garatzeko. Talka plana hiru hilabetetan amaitu beharko du horretarako kontratatutako enpresak eta estrategikoa, aldiz, 10 hilabetetan. Zentzu horretan egitasmo gehienen nondik norakoak -kokapena, enpresak...- ez dituzte zehaztuko bi plan horiek bukatu arte.
Diru gehien jasoko duen lan ildoa industria izango da, 10 milioi euro bideratuko baitituzte.
Edonola ere, dokumentuak argi jasotzen duen aldea da eskualdera bideratuko den diru kopurua:
- Industrian 10 milioi euro inbertituko dira. Ildo nagusiak izango dira tokiko enpresen modernizazioa eta abandonatutako lursail eta eraikin industrialen birgaitzea.
- Enpleguan eta Lanbide Heziketan 2 edo 3 milioi erakarriko ditu ponentziak. Besteak beste, Lanbide Heziketako modulu berriak eskainiko dira tokiko ikastetxeetan.
- Hiri eraberritzean 3 edo 4 milioi euro gastatuko dituzte eta diru horren zati bat erabiliko da behin behinean ostatu hartzeko etxebizitzetan.
- Azpiegituretan eta mugikortasunean 4 edo 5 miloi euroko inbertsioa egingo da. Adibidez, Nerbioiko parke lineala Arrankudiagaraino eta Urduñaraino luzatuko da eta eskualdeko tren geltokietan hobekuntzak egingo dira irisgarritasun eta segurtasunean. Mugikortasun elektrikoa sustatzeko karga puntuak ezarriko dituzte.
- Turismoan eta kulturan milioi 1 eta 1,5 arteko bitartekoak baliatuko da. Upategien eta txakolinaren ibilbideak hartuko du zati bat eta kultura suspertzeko plana ere prestatuko da.
- Merkataritza dinamizatzeko 250.000 eta 500.000 euro arteko aurrekontua egongo da.
- Lehen sektoreak 2 milioi euroko ekarpena jasoko du. Hala ere, egitasmoak ez dira oso argiak. Izan ere, Laudioko Hiltegia berriro irekitzeko saiakera aipatzen da. Urduñan hiltegi txikia prestatzeko bideragarritasun plana ere aztertuko da. Eskualdeko ikastetxeak eta nagusien egoitzak hornitzeko sukalde zentrala bideragarria ote den ere landuko da diru horrekin.