Aiarako Kuadrillako egoitza Aiara udalerrian egongo da

Laudioko Udaletxean egin dute gaurko bilkura. / Aiaraldea.eus

Aiarako Kuadrillako bilkuran erabaki dute egoitza Aiarako udalerrian kokatzea. Horretarako, Arabako Batzar Nagusiek foru araua aldatu beharko dute.

Gaur Laudion egin dute Aiarako Kuadrillako bilkura. Bi ordu iraun du bilerak eta, besteak beste, behin betiko itxi dute urteak hartu dituen eztabaida. Izan ere, denbora luzez ezbaian egon da kuadrillako egoitzaren kokapena zein izan behar den. Modu ez ofizialean, Aiaran egon da orain arte.

Azkenean, adostasun zabalarekin, erakundeak ondorioztatu du Aiara dela tokirik egokiena bere eraikina hartzeko. Alderdi guztien babesa izan du egitasmoak, Omniarena salbu. Alderdi independenteak uste dut egoitza Laudion egon beharko litzatekeela. Dena den, talde laudioarrak ez du kontrako botoa eman, abstenitu da, Aiara ere aproposa dela iritzita.

Aiarako udalerriak hartuko du Aiarako Kuadrillaren egoitza. Arabako Batzar Nagusiek foru aldatu  beharko dute horretarako, eta tokiko erakundeak eraikinaren beharrak definitu beharko ditu, espazio egokiena topatzeko.

Gentza Alamillo alkateak eskerrak eman dizkie Aiarako Kuadrillako ordezkariei eta Aiaraldea Komunikabideari azaldu dio zein izango den prozedura hemendik aurrera: "Alde batetik, Arabako Batzar Nagusiek aldatu foru araua behar dute, eta Laudiotik Aiarara igaroko da eskumen hori. Bestetik, kuadrillak berak ezarri behar ditu eraikinak izango dituen beharrak. Azkenik, eraikin egokia bilatuko da Aiaran, beharrei egokitutakoa, eta ikusiko da inbertsioak beharrezkoak izango diren".

2022ko aurrekontuak

Gai ugari landu dira gaurko bilkuran. Alde batetik,4.547.000 euroko aurrekontua onartu dute 2022rako. Alderdi guztiek egin dute alde, Okondo Aurrerak eta Omniak salbu.

Horrez gain, aho batez onartu dira Euskararen Nazioarteko Egunaren eta Azaroaren 25eko (Indarkeria matxistaren kontrako nazioarteko eguna) adierazpen instituzionalak.

Adostasun hori ez dute izan AP-68 Doan plataformak aurkeztutako mozioarekin. EH Bilduk kritikatu du EAJk eta PSE-EEk onartu nahi duten lege aldaketa, zenbait proiektu publiko interes orokorrekoak bezala definitzeko eta gauzatzeko udalerrien Hiri Antolamendu Plan Orokorra aldatuta.

AP-68ri buruzko testuak Aiara Batuz, Okondo Aurrera eta Omniaren babesa izan du soilik. PSE-EE eta EAJ aurka azaldu dira eta EH Bildu abstenitu da.

EH Bilduren mozioak, aldiz, independenteen aldeko botoa izan du, baina ez du aurrera egin, jeltzaleen eta sozialisten kontrako jarreragatik.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide