Larunbat honetan ez da Aiaraldeko Euskararen Eguna ospatuko. Hala jakinarazi dute Aiaraldeko Euskalgintza Kontseiluak, Aiarako Kuadrillak eta Aiarako Udalak gaur goizean plazaratutako ohar bateratuaren bidez.
Bi arrazoi direla eta hartu dute erabakia: COVID-19aren pandemiaren bilakaeraren okertzea eta eguraldi aurreikuspena. "Atzo, gure eskualde osoa eremu gorrian sartu zen. Laster neurriak zorrozteko aginduak iritsiko direla uste dugu. Instituzioetan baina baita herritarren artean ere kezka sumatzen da. Gainera, azken egunetako euriteen ondorioz izan diren uholdeak zein astebururako eguraldi aurreikuspenek, ezin besteak, abenduaren 4ko jaia egiteko baldintzak ematen ez direla ondorioztatzera garamatza.
Antolatzaileek aitortu dute ez dela erabaki erraza izan, "zaila eta mingarria" baizik, "baina egoerak hala behartzen gaituela ulertzen dugu".
Aurrerago egiteko konpromisoa
Hala ere, jaia aurrerago antolatzeko konpromisoa hartu dute antolatzaileek, prest zuten "parametro eta programazioarekin".
Bukatzeko, "eskerrik beroenak" helarazi nahi izan dizkiete jaiaren antolakuntzan murgilduta egon diren pertsona guztiei. "Gure aitortza eta esker ona azaldutako ulerkotasunagatik, erabaki honen kaltetu handienak diren profesionalei: soinu teknikari, antzerki konpainia, musikari... data berrirako guztiekin kontatzea espero dugu".