Euskal presoen eskubideen alde, eskualdeko manifestazioa egingo dute larunbatean Laudion

Iaz Aiaraldeko udalerri guztietan egin zituzten euskal presoen eskubideen aldeko mobilizazioak. / Aiaraldea.eus

COVID-19ak eragindako osasun egoera dela eta, urtarrilaren 8ko Bilboko manifestazio nazionala Hego Euskal Herriko herrietara eraman du Sarek. Aiaraldean eskualdeko manifestazioa egingo dute, Laudion. Arrankudiaga-Zollon ere mobilzatuko dira herritarrak.

Bigarren urtez jarraian, COVID-19ak eragindako osasun egoerak ezinezko egin du Bilboko manifestazio nazional jendetsua egitea. 80.000 eta 100.000 lagun artean elkartzen ditu urtarrileko mobilizazioak, eta data hau euskal presoen eskubideen aldeko aldarrikapenaren barruan "ikur" bilakatu dela azpimarratu dute Sareko bozeramaileek. Hori dela eta, egun horretako aldarrikapena Hego Euskal Herriko herrietara mugitu dute antolatzaileek: "urtarrilaren 8 honetan inoiz baino beharrezkoago ikusten dugu aldarrikapena bizirik mantentzea eta Euskal Herriko herri guztietako kaleak betetzea bidea egiten jarraitzeko: bizikidetzarako bidea, bakerako bidea, etxerako bidea".

Eskualdeko manifestazioa Laudion

Aiaraldean ere mobilizatuko dira euskal presoen etxeratzearen alde. Eskualdeko manifestazioa egingo dute urtarrilaren 8an -larunbata- Laudioko kaleetan barrena. Manifestazioa Aldai Plazatik abiatuko da, 18:00etan, eta eskualdeko bizilagunak elkartuko ditu.

Arrankudiaga-Zollon ere mobilizatzeko deialdia egin dute herritarrek. Manifestazioa egingo dute larunbatean, arratsaldeko 17.00etan, herriko plazatik abiatuta.

Iaz ere herrietan burutu zen Bilbon egin beharreko manifestazio jendetsua, eta ehunka lagun izan ziren Aiaraldeko kaleetara euskal preso eta iheslarien eskubideen defentsan atera zirenak. Orduko hartan Amurrio, Arrankudiaga-Zollo, Urduña, Orozko, Okondo eta Laudion egin ziren manifestazio eta elkarretaratzeak.

Espetxe-politika aldatzeko beharra

Azken urte honetan urrats garrantzitsuak eman dira espetxe-politika aldatzeko bidean, eta asko izan dira Euskal Herriko espetxeetara hurbilduak izan diren euskal preso politikoak, baina Sarek nabarmendu du oraindik ere bide luzea geratzen dela egiteke: "euskal preso gehienak Euskal Herritik kanpoko espetxeetan daudelako oraindik, eta gradu-progresioa blokeatuta dagoelako. Ondorioz, presoek ezin dute egin etxera itzultzeko prozesua".

Halaber, pandemiak presoengan eta euren senideengan izandako eragina ere azpimarratu dute manifestazioko deitzaileek: "pandemia honek eragin zuzena dauka presoengan eta haien senideengan. Berriro ere zailtasunak daude zenbait espetxetan bisitak egiteko, bereziki aurrez aurrekoak".

Gauzak horrela "inoiz baino beharrezkoagoa" ikusten du Sarek aldarrikapenak bizirik mantentzea eta Euskal Herriko herri guztietako kaleak betetzea.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide