Talde gaztea da zuena, baina aldaketak izan dituzue, ez?
Ieltxu Ruiz: 2018an sortu genuen Zutik! taldea. Asier zegoen baterian, Moreno baxuan eta ni abeslari bezala. Jon Iturregik jotzen zuen gitarra. Orain,aldiz, Ekaitz‘Lentejita’ sartu da bere ordez. Aurrera egiteko gogoekin gabiltza, erritmo azkarrekin mugitzen den musika egiteko prest.
Diskoa argitaratu duzue dagoeneko.
Jon Moreno: Bai, 2020. urteko abuztuan grabatu genuen, Urduñako Konjuntibitis estudioan, Jabi Palaciosekin. Emaitza ona izan da. Eskerrak eman behar dizkiogu Jabiri bere pazientziagatik.
Hardcore-punk abestiak egin ditugu, metal doinuekin nahastuta. Kritika soziala jorratzen dugu letretan, gure bizipen eta esperientzietan oinarrituta. Askatasun doinuak dira gureak (barreak).
Zertan zabiltzate orain?
Asier Ors: Ekaitz taldean sartu zenetik abesti berriak konposatzen eta kontzertuak prestatzen ari gara. Baliteke aurten disko berria plazaratu ahal izatea.
Zer moduz moldatu zara taldera, Ekaitz?
Ekaitz Etxebarria: Aurretik beste hainbat taldetan aritu naiz, hardcore-punka jorratzen beti.
Talde honetan aurkitu dudana hori da: azken urte hauetan beste talde batzuetan egiten egon naizen gauza bera, animo eta energia askorekin.
Horregatik, prest gaude abestiak grabatu, kontzertuak egin eta egurra emateko.